Bakı. Ənvər Məmmədov - Trend:
Dağlıq Qarabağ münaqişəsinin tənzimlənməsi ilə bağlı Azərbaycan və Ermənistan prezidentlərinin Vyana görüşü çox müsbət faktdır.
Trend-in məlumatına görə, bunu Aİ-nin Bakıdakı nümayəndəliyinin rəhbəri Malena Mard deyib.
O bildirib: "Biz müxtəlif tədbirlərin keçirilməsi, insidentlərin araşdırılması, hərtərəfli sülh danışıqları üçün "yol xəritəsinin" planlaşdırılması, yaxın vaxtlarda ikinci görüşün planlaşdırılması barədə qərarı dəstəkləyirik".
Aİ nümayəndəliyinin başçısı vurğulayıb ki, münaqişənin hərbi həlli yoxdur: "O, sülh danışıqları əsasında həll olunmalıdır, danışıqlarda əsas rolu prezidentləri və həmsədrlər oynayırlar. Bildiyiniz kimi, Aİ-nin xarici işlər və təhlükəsizlik siyasəti üzrə ali nümayəndəsi Federika Moqerini prezidentlərlə görüşüb. Fevralda Azərbaycanda olarkən, o bildirib ki, bu problemlə şəxsən yaxından məşğul olacaq və bu məsələdə Minsk qrupunun tərəfdaşı olmaq istəyir".