Dağlıq Qarabağda saxlanılan azərbaycanlı hərbi qulluqçu bu gün - yanvarın 16-da Beynəlxalq Qırmızı Xaç Komitəsinin (BQXK) himayəsi altında Azərbaycanın müvafiq hakimiyyət orqanlarına təhvil verilib. Bu barədə Trend ə Beynəlxalq Qırmızı Xaç Komitəsinin Azərbaycan nümayəndəliyindən məlumat verilib.
Əməliyyat cəbhə xəttində Azərbaycan Respublikasının Ağdam rayonunun ərazisində həyata keçirilib. Neytral vasitəçi kimi iştirak edən BQXK öz mandatına uyğun olaraq azad olunmuş hərbi qulluqçunun ötürülməsini bütün tərəflərin müraciətinə əsasən və onların tam əməkdaşlığı şəraitində həyata keçirib.
Təhvilvermə əməliyyatından əvvəl BQXK-nın nümayəndələri geri qayıtmaq arzusunda olduğunu təsdiqləmək üçün saxlanılan əsgərlə görüşüblər.
Xatırladaq ki, 2005-ci ilin iyulunda hərbi xidmətə çağırılmış 1976-cı il təvəllüdlü Eldəniz Nuriyev 2006-cı ilin sonunda Füzuli rayonu ərazisində dekabrın 30-dan 31-ə keçən gecə azaraq düşmən tərəfə keçmişdi.