Azərbaycan, Bakı, 10 yanvar / Trend , müxbir Q.Cəbiyev/ Hakim Yeni Azərbaycan Partiyasının (YAP) prezident seçkilərində namizədini dəstəkləyəcək yeni blok yaradıla bilər. "Prezident seçkiləri ərəfəsində Yeni Azərbaycan Partiyasının namizədi, hazırkı dövlət başçısı İlham Əliyevin namizədliyini dəstəkləyən partiyaların bir blokda birləşəcəyi gözlənilir" cümə axşamı Trend ə iqtidaryönlü Ana Vətən Partiyasının (AVP) sədri, millət vəkili Fəzail Ağamalı bildirib.
Azərbaycanda prezident seçkiləri oktyabrda keçiriləcək. YAP rəsmiləri seçkilərdə partiyanın sədri Əliyevin namizədliyini irəli sürəcəklərini açıqlayıblar. Müxalif Xalq Cəbhəsi, Liberal, Vətəndaş və İnkişaf partiyalarının birləşdiyi "Azadlıq" bloku seçki komissiyalarının tərkibi dəyişməyəcəyi təqdirdə seçkiləri boykot edəcəyini bildirib.
Ağamalı deyib ki, hazırda Əliyevin namizədliyini dəstəkləyən partiyaların sayı getdikcə artmaqdadır. Bu sıraya vaxtilə radikal mövqedə olan müxalifət partiyaları da qoşulmaqdadır. AVP sədri bildirib ki, Əliyevin namizədliyini dəstəkləyən blok yaranarsa, rəhbərlik etdiyi partiya həmin bloka qoşulacaq.
