Gürcüstan, Tbilisi, 11 yanvar / Trend , müxbir N. Kirtsxaria / "Yeni Sağlar" müxalifət partiyasının lideri, prezidentliyə namizəd David Qamkrelidze Gürcüstanda vətəndaş qarşıdurmasına yol verməmək üçün prezident seçkisinin ikinci turunu keçirməyi lazım bilir.
"Mixail Saakaşvilinin lazımı sayda səs toplamadığı və qalib olmadığı reallıqdır" - cümə günü Qamkrelidze Trend ə bildirib.
Yanvarın 5-də Gürcüstanda vaxtından əvvəl prezident seçkiləri keçirilib. Prezidentliyə namizəd hazırkı prezident Mixail Saakaşvili MSK-nın məlumatına görə, seçicilərin 53,32 faiz səsini toplayıb. Vahid müxalifətin namizədi Levan Qaçeçiladzeyə seçicilərin 25,26 faizi səs verib.
Seçkidə məğlubiyyətini qəbul edən Qamkrelidze bildirib ki, beynəlxalq birliyin və müşahidəçilərin müsbət qiymətinə baxmayaraq, seçki prosesi ağır şəraitdə keçib.
"Tblisidə müşahidəçilər məntəqələrdə iştirak etdiyi üçün seçki prosesi az da olsa azad keçib. Lakin əyalətlərdə seçicilər qorxu altında, təzyiqə məruz qalaraq məntəqələrə gediblər" - Qamkrelidze bildirib.
Prezidentliyə namizədin sözlərinə görə, 450 xarici müşahidəçi fiziki cəhətdən 3 400 məntəqədə açılandan bağlanana qədər və səslərin hesablanması zamanı iştirak edə bilməyib, bu da seçkilərin nə dərəcədə şəffaf keçdiyini göstərir.
"Beləliklə, mənim proqnozuma görə, Saakaşvili səslərin 35 faizini alıb, onun müxalifətdən olan rəqibi Qaçeçiladze isə 40 faizdən artıq səs toplayıb. Buna görə də, seçkinin ikinci turu təyin olunmalıdır, çünki ölkəni qanuni prezident idarə etməlidir" - Qamkrelidze bəyan edib.
Onun sözlərinə görə, "xalqın maraqları qorunmalıdır. Elə etmək lazımdır ki, müxalifətin mövqeyi radikallaşmasın, tərəflər məsələni sülh yolu ilə həll etsinlər".
Qamkrelidzenin sözlərinə görə, müvəqqəti sülh çıxış yolu deyil. "Bu, məsələni azacıq soyuda bilər, lakin iki aydan sonra təkrar olaraq küçələrə çıxacaqlar. Bu dəfə isə hadisələri kökündən dəyişəcəklər" - partiya lideri bildirib.