Azərbaycan, Bakı, 05 fevral / Trend , müxbir Q.Cəbiyev/ Müxalif Azərbaycan Demokrat Partiyası (ADP) hər hansı müxalifət namizədini dəstəkləmək variantı barədə düşünmür. "Müxalifətdə məndən reytinqinə, qabiliyyətinə, bacarığına görə kəskin fərqlənən lider yoxdur ki, ona görə namizədliyimi geri götürüb güzəştə gedəm" çərşənbə axşamı Trend ə ADP sədri Sərdar Cəlaloğlu deyib.
ADP oktyabrda Azərbaycanda keçiriləcək prezident seçkisində iştiraka qərar verib. ADP fevralın 16-da seçkilərdə iştirakla bağlı yekun qərarını açıqlayacaq. Partiya üzvlərinin əksəriyyəti Cəlaloğlunun prezidentliyə namizədliyinin irəli sürülməsinin tərəfdarıdır.
Cəlaloğlu deyib ki, partiya rəhbərliyində olduğu 17 ildə milli maraqlar naminə, müxalifətin birləşməsi naminə digər müxalifətçilərə güzəştə gedib. "Bu güzəştlərə getmək seriyasının sonu olaraq belə bir haqq qazanmışam ki, başqa müxalifət liderləri də bizə güzəştə getsin" partiya sədri əlavə edib.
Onun sözlərinə görə, Azərbaycanda "əməkdar" namizədlər var ki, hər seçkidə öz namizədliklərini verirlər: "Zamanı çatıb ki, Cəlaloğlunu vahid namizəd kimi göstərib onun ətrafında birləşsinlər".
ADP ötən ilin əvvəllərində radikal siyasi kursdan imtina edib.