Azərbaycan, Bakı, 08 fevral / Trend , müxbir K.Zərbalıyeva/ Ötən il respublika üzrə 22 quldurluq cinayəti bağlı qalıb. Bu barədə cümə günü Baş Prokurorluqda prokurorluq orqanları tərəfindən ötən il görülmüş işlərin vəziyyəti və qarşıda duran vəzifələrin müzakirəsinə həsr olunmuş kollegiya iclasında baş prokuror Zakir Qaralov məlumat verib. Baş prokuror bildirib ki, bu cinayətlərin 16-sı Bakı şəhərində qeydə alınıb. Qaralov 2007-ci ildə 13 qəsdən adam öldürmə hadisəsinin bağlı qaldığını deyib.
Bağlı qalan cinayətlərdən 3-ü Gəncə, 2-si Bakı şəhərinin Binəqədi, biri isə Nərimanov, Nəsimi, Xətai rayonlarının, həmçinin respublikanın Qaradağ, Xanlar, Qobustan, Tovuz və Zaqatala rayonlarının payına düşür.
Ötən il əvvəlki illərdə törədilən və bağlı qalan 127 cinayətin üstü açılıb. Baş prokuror bildirib ki, 2007-ci ildə əvvəlki illərdən bağlı qalan 16 ağır və xüsusilə ağır cinayət açılıb, ötən il ərzində qeydə alınmış ümumi və az ağır cinayətlərin, qəsdən adam öldürmə, qəsdən sağlamlığa ağır zərər vurma, adam oğurluğu, zorlama, oğurluq, soyğunçuluq, quldurluq, avtonəqliyyatın qaçırılması, xuliqanlıq, yetkinlik yaşına çatmayanlar tərəfindən, xarici vətəndaşlara qarşı törədilən cinayətlərin sayı azalıb.
Qaralovun sözlərinə görə, hesabat dövründə törədilmiş 18667 cinayətin təxminən 92,1 faizinin açılması təmin edilib.Hesabat ilində qeydə alınmış ağır və xüsusilə ağır, adam öldürməyə cəhd, qəsdən sağlamlığa az ağır zərər vurma, seksual xarakterli zorakılıq hərəkətləri, hədə-qorxu ilə tələb etmə cinayətlərinin, ölümlə nəticələnən yol nəqliyyat hadisələrinin, insan alveri ilə bağlı cinayətlərin sayı artıb.
Baş prokuror istintaq işi və ibtidai araşdırmaya prosessual rəhbərliyin həyata keçirilməsində, cinayətkar hərəkətlər nəticəsində hüquqi və fiziki şəxslərə vurulmuş zərərin ödənilməsi, vətəndaş müraciətlərinə baxılması və onların qəbulu ilə əlaqədar işin təşkilində nöqsanlara yol verilidiyini deyib.
