Azərbaycan, Bakı, 04 mart / Trend , müxbir Q.Cəbiyev/ Azərbaycanın müxalif Demokrat Partiyasının (ADP) sədri, prezidentliyə namizəd Sərdar Cəlaloğlu özünün "kölgə kabineti"ni formalaşdırıb. Bu barədə çərşənbə axşamı Trend -a Cəlaloğlu özü məlumat verib.
Azərbaycanda seçkilər oktyabrda keçiriləcək. Fevralın 16-da ADP Ali Şurası Cəlaloğlunun namizədliyini irəli sürüb. Partiya vahid komanda ideyasını irəli sürərək, Cəlaloğlunun ətrfında komanda yaratmağa başlayıb.
ADP sədri bu ideyaya cəmiyyətin kifayət qədər tanınmış şəxslərinin qoşulduğunu bildirib. "Mənim komandamda təmsil olunmaq üçün aparıcı müxalifət partiyalarının tanınmış təmsilçiləri, funksionerlər də müraciət ediblər və onların müraciətinə müsbət cavab verilib"- Cəlaloğlu əlavə edib. O, seçki kampaniyasına rəsmən start verildikdən dərhal sonra həmin şəxslərin adlarını və özünün "kölgə kabineti"ni cəmiyyətə açıqlayacağını deyib.
Sağ təmayüllü partiya olan ADP 1991-ci ildə Sərdar Cəlaloğlu tərəfindən təsis edilib. Partiya ötən ilin yanvarınadək iqtidara qarşı radikal müxalif mövqedə olub. Ötən ilin yanvarında ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq, keçmiş sədr Rəsul Quliyev və tərəfdarları ADP-dən imtina edərək, özlərinin Açıq Cəmiyyət Pariyasını yaradıblar.