Azərbaycan, Bakı, 5 mart / Trend , müxbir R.Hafizoğlu / ABŞ -ın İslam Konfransı Təşkilatında təmsil olunması 11 sentyabr hadisələrindən sonra müsəlmanların nəzərində itirilən nüfuzun bərpası və dialoqa hazırlıq kimi qiymətləndirilə bilər. "Vaşinqtonun İKT- də təmsil olunması Amerikanın İslam dünyası ilə dialoqunun baılanğıcı hesab edilə bilər"-deyə, İKT-nin siyasi burosunun direktoru Mehdi Fəthullah Trend a bildirirb.
ABŞ Dövlət Departamentinin martın 3-dəyaydığı məlumatda 57 yaşlı Pakistan əsilli iş adamı Səda Kumberi İslam Konfransı Təşkitlatında ABŞ-ın təmsilçisi təyin olunub. Prezident Corc Bush bununla bağlı açıqlamasında deyib ki, bu missiyanın mahiyyəti Amerikanın azadlıq, sülh və İslam dunyasının dostu olduğunu izah etməkdir.
Fəthullahın fikrincə, Vaşinqtonun İslam Konfransı Təşkilatında təmsil olunması bir çox problemlərin həlli istiqamətində müsbət nəticə verə bilər. "Amerika ilə İslam dünyası arasında bəzi anlaşılmazlıqlar olsa da, bu ölkənin İKT-də təmsil olunması müsbət və təqdirəlayiq addımdır "-deyə, Fəthullah çərşənbə günü Ciddədən telefonla bildirib.
Corc Vaşinqton Universitetinin eksperti Mərvə Kavakçı da hesab edir ki, ABŞ-ın islam təşkilatında təmsil olunması, müsəlmən dünyasında anti-Amerika əhval-ruhiyyəsinin azalması ilə nəticələnə bilər. "Bu addım 11 sentyabr hadisələrindən sonra müsəlman ölkələri arasında itirilən nüfüzu bərpa edə bilər",-deyə, Kavakçı Trend -a bildirib.
Kavakçının fikrincə, ABŞ-ın İKT-də təmsil olunması müsəlman dünyasına öz fikirlərini təbliğ etmək kimi qiymətləndirilməməlidir. ABŞ-ın ən böyük problemlərindən biri İslam ölkələrində işğalçı dövlət kimi tanınmasıdır - deyə, Kavakçı, çərşənbə günü ABŞ-dan elektron poçt vasitəsilə bildirib.
"Müsəlmanlar arasında ABŞ-ın nüfuzunun artması üçün Amerikada bir çox layihələr həyata keçirilməkdədir. ABŞ bir çox islam mütəfəkkirlərini ölkəyə dəvət etməsi qarşılıqlı dialoq və əlaqələrin bərpası üçün atdığı addımlardan biridir"-deyə Kavakçı qeyd edib.
"İslam dünyası ABŞ -ın İKT-də təmsil olunmasından öz mənafeyi üçün istifadə edə bilər. Bu addımla müsəlmanlar ABŞ-da islam haqqında formalaşmış səhv fikir və düşüncələrin qarşısını ala bilərlər"-deyə, ekspert bildirib.
İKT-nin əsası 1969-cu ildə Rabat şəhərində keçirilən müsəlman ölkələri və başçılarının Konfransında qoyulub. İKT-də 57 üzv və 10 müşahidəçi ölkə iştirak edir. Azərbaycan İKT-yə 1992-ci ildən daxil olub.
