Azərbaycan, Bakı,19 mart / Trend , müxbir R.Hafizoğlu/ İraqın Bəsrə şəhərində koalisiya qüvvələrin tərkibindəki İngiltərə ordusunun fəaliyyətsizliyi terrorçuların silahlanması və şəhərin nəzarətdən çıxması təhlükəsi yaradıb. "İngiltərə qüvvələrinin fəaliyyətsizliyi İraqın ikinci paytaxtı hesab edilən Bəsrədəki terrorçuların İran tərəfdən silahlanması ilə nəticələnəcək"-deyə İraqlı politoloq Riyad Əl-Qəyyim bidirib.
Türkiyəli KİV-in martın 18-də verdiyi məlümatlara görə, İraqın XİN başçısı Xoşyar Zəbari İngiltərənin "Channel4"də verdiyi müsahibədə Bəsrədə yerləşən İngiltərə hərbi qüvvələrini fəaliyyətsizlikdə ittiham edərək onları Bəsrənin terrorçular tərəfindən işğal edilməsi üçün şərait yatarmaqda günahlandırıb.
"Bəsrədəki İngiltərə qüvvələrinin terrorçulara qarşı mübarizə aparmaması İraq hökumətinin göstərişi ilədir" - deyə iraqlı politoloq əl-Qəyyim çərşənbə günü Bağdaddan elektron poçtla Trend a bildirib. O hesab edir ki, Bəsrədəki İngiltərə qüvvələrinin fəaliyyətsizliyi İraq hökumətinin rəsmi göstərişi ilədir.
"Hökumət İngiltərə qüvvələrini fəaliyyətsizlikdə ittiham etməklə regionda İran üçün "yaşıl işıq" yandırmaq niyyətindədir" - deyə əl-Qəyyim qeyd edib. Onun fikrincə, Bəsrədəki İngiltərə qüvvələri terrorçulara qarşı mübarizə aparmaq imkanındadır və onlar öz missiyasını bərpa etməlidirlər.
Kərkük Strateji Araşdırmalar Mərkəzinin direktoru Əhməd Təqiy də hesab edir ki, ölkədəki
İngiltərə sülhməramlıları terrorçulara qarşı mübarizə aparmaq imkanındadırlar. "Hər cür silah və texnika ilə təchiz olunmuş koalisiya qüvvələrinin terrorçular qarşısında aciz qalması qeyri-mümkündür" - deyə Təqiy çərşənbə axşamı Kərkükdən telefonla Trend a bildirib.
O hesab edir ki, İngiltərə qüvvələrinin fəaliyyətsizliyi Bəsrədəki İran meylli qüvvələrin və digər terrorçu qrupların aktivləşməsi ilə nəticələnəcək. "İngiltərə qüvvələri öz missiyasını bərpa etməlidir, əks təqdirdə Bəsrə İraq hökumətinin nəzarətindən çıxacaq" - deyə o qeyd edib.
Təqiy hesab edir ki, İngiltərə sülhməramlılarının fəaliyyətsizliyi İraq hökumətinin xüsusi göstərişi ilədir.
Müxtəlif kütləvi informasiya vasitələrində İraqda müharibə başlayandan bu günə qədər ölən və itkin düşən insanların ümimi sayı 350 mindən 4 milyon nəfər arasında göstərilir.
