Azərbaycan, Bakı, 02 may / Trend müxbir C.Babayeva/ Azərbaycan Milli Demokrat Partiyasının (AMDP) Nəsimi rayon təşkilatı partiyanı tərk edərək siyasi fəaliyyətini Azərbaycan Yolu Siyasi Hərəkatının (AYSH) sıralarında davam etdirməsi barədə qərar qəbul edib. Bu barədə rayon təşkilatının Trend -a daxil olan bəyanatında bildirilir.
Müxalifəti təmsil edən Azərbaycan Milli Demokrat Partiyasının (AMDP) sədri, keçmiş daxili işlər naziri İsgəndər Həmidov partiya sədrliyindən istefa verib siyasətdən getdiyini bəyan edib. Həmidov istefasının səbəbini gənclərə yol açması ilə izah edib.
Bəyanatda qeyd olunub ki, partiya sədri Həmidovun istefasından sonra Nəsimi rayon təşkilatının ümumi toplantısı keçirilib. Toplantıda iştirak edən 71 nəfər üzvün yekdil qərarı ilə AMDP-nin sıralarını tərk etmək barədə qərar qəbul olunub.
"İsgəndər Həmidovun istefasından sonra AMDP-nin sədrlik postuna kimin seçiləcəyi və həmin şəxsin qurumu idarə etmək üçün hansı resursa malik olması sual altına düşüb", deyə bəyanatda qeyd olunub.
Bir müddət öncə, AMDP rəhbərliyində təmsil olunan keçmiş partiya sədri Həmidovun birinci müavini Şəmsəddin Rəhimli, ideoloji məsələlər üzrə müavini Süleyman Osmanoğlu, təşkilati məsələlər üzrə müavin Asəf Həsənov, ümumi şöbənin müdiri Sevinc Hacıyeva da Azərbaycan Yolu Siyasi Hərəkatına keçdiklərini bəyan ediblər.
AMDP 1993-cü ildə yaradılıb və ilk adı "Boz Qurd" Partiyası olub. 1994-cü ildə Ədliyyə Nazirliyində dövlət qeydiyyatından keçib. 1995-ci ildə Ali Məhkəmə partiyanın adının müvafiq olmadığını əsas gətirərək "Boz Qurd"un dövlət qeydiyyatını ləğv edib. Partiya qeydiyyat problemini həll etmək üçün 1999-cu ildə keçirdiyi ikinci qurultayında adını dəyişib və Milli Demokrat Partiyası adlandırılıb. Lakin Ədliyyə Nazirliyi partiyanı qeydiyyata almaqdan imtina edir. Keçmiş partiya sədri, sabiq daxili işlər naziri Həmidov 1995-2004-cü illərdə həbsdə olub. 14 il azadlıqdan məhrum edilən Həmidov 2004-cü ildə prezidentin əfv fərmanı ilə azadlığa çıxıb.
Müxalifəti təmsil edən AYSH 2004-cü ildə yaradılıb. Hərəkatın sədri Rusiyanın istefada olan ədliyyə general-leytenantı İlqar Qasımovdur.
