Azərbaycan, Bakı, 13 may / Trend , müxbir C.Babayeva/ Azərbaycanın "Dalğa" gənclər hərəkatının üzvləri oktyabrın 15-də keçiriləcək prezident seçkisini müşahidə edəcək. Bu barədə çərşənbə axşamı Trend -a hərəkatın sədr əvəzi Araz Qasımov məlumat verib.
Qasımovun sözlərinə görə, "Dalğa" gənclər hərəkatı Seçki Monitorinq Mərkəzi (SMM) ilə əməkdaşlıq edəcək.
SMM prezident seçkisinin azad, demokratik və ədalətli keçirilməsi məqsədilə seçkilərin uzunmüddətli və qısamüddətli müşahidəsi üçün könüllülər cəlb edir. Könüllülərin fəaliyyət ərazisi SMM-in bölgə nümayəndəliklərinin yerləşdiyi Azərbaycanın şəhər və rayonlarını əhatə edəcək. SMM 2008-ci ilin fevralında Ədliyyə Nazirliyində qeydiyyata alınıb. Bundan 2 ay sonra nazirlik SMM-in qeydiyyatının etibarsız sayılması və ləğvi iddiası ilə məhkəməyə müraciət edib. Yaxın vaxtlarda məhkəmə yekun qərar qəbul edəcək.
""Dalğa"nın 15 üzvü uzunmüddətli, 150 üzvü isə qısamüddətli müşahidə aparacaq", deyə Qasımov bildirib.
Onun sözlərinə görə, "Dalğa" gənclər hərəkatı seçicilərin fəallığının artırılması və məlumatlandırılması məqsədilə mühazirələr, aksiyalar təşkil edəcək.
"Dalğa" hərəkatının prezidentliyə hər hansı bir namizədi dəstəkləyəcəyinə gəlincə, Qasımov bildirib ki, hərəkat öncə bəyan etdiyi kimi, heç bir namizədi dəstəkləməyəcək.
"Dalğa" gənclər hərəkatı 2005- ci ilin fevralında yaradılıb.
Məqalə müəllifi ilə əlaqə saxlamaq üçün ünvan - [email protected]
