Azərbaycan, Lənkəran, 13 may / Trend , müxbir P.Əliyeva/ Hakim Yeni Azərbaycan Partiyasının (YAP) Lənkəran rayon təşkilatı siyasi partiyaları konstruktiv əməkdaşlıga dəvət edib. "Biz müəyyən qədər üzvləri olan və cəmiyyətdə qəbul olunmuş partiyaları konstruktiv əməkdaşlıga dəvət edirik. Konstruktiv əsaslar üzərində fəaliyyət göstərəcək, cəmiyyətdə sosial bazaya, ictimai, siyasi proseslərə təsir gücünə malik ola biləcək hər bir partiya ilə dialoqa hazırıq" çərşənbə axşamı Trend -a YAP Lənkəran rayon təşkilatının sədr müavini Əlimərdan Əliyev bildirib.
YAP Lənkəran təşkilatının sıralarında 8300 üzv var ki, onların 4000-ə yaxınını gənclər təşkil edir. Təkcə son 4 ayda 600 nəfər YAP sıralarına daxil olub. Lənkəranda 18 siyasi partiyanın rayon təşkilatı fəaliyyət göstərir.
Əliyev deyib ki, rayonda YAP-la rəqabətə girə bilən partiya yoxdur. Onun sözlərinə görə, Müsavat, Xaıq Cəbhəsi (AXCP), Demokrat partiyalarının rayon təşkilatlarının rayonda sosial bazası zəifdir. "Bir vaxt onların mitinqlər üçün şüar seçdikləri sosial problemlər artıq Lənkəranda yoxdur və son 2 ildə Lənkəranda müxalifət partiyaları heç bir aksiya keçirməyib" Əliyev əlavə edib.
Müsavat Partiyasının Lənkəran rayon təşkilatının sədri Yadigar Sadıqov isə Trend -a bildirib ki, müxalifət partiyalarının əksəriyyətinin zəiflədiyi ilə razıdır. Lakin istənilən seçkinin nəticələri sübut edir ki, "Müsavat" Lənkəranda kifayət qədər potensiala malikdir və sosial bazası mövcuddur. "Müxalifət ictimai fikrə yönəlik addımlar atmalıdır və ictimaiyyət tərəfindən reaksiya olmalıdır. Buna qarşı rayonlarda bir qədər daha çox xof hökm sürdüyü üçün passivlik həmişə olub" Sadıqov əlavə edib. Onun sözlərinə görə, müxalifətçilər hüquqi, iqtisadi, siyasi azadlıqlar baxımından əlverişsiz şəraitdədirlər. Lənkəranda siyasi azadlıqları həyata keçirmək qeyri mümkündür.
Lənkəran paytaxt Bakıdan 270 kilometr cənubda yerləşir.
Məqalə müəllifi ilə əlaqə ünvanı: [email protected]
