Çexiya, Brno, 15 may/ Trend , müxbir S.Nəcəfov/ Azərbaycan Çexiyada yalnız öz enerji ehtiyatlarına görə deyil, zəngin mədəniyyəti, ədəbiyyatı ilə də təbliğ olunur. "Əvvəllər Çexiyada yalnız neft ölkəsi kimi tanınan Azərbaycan indi mədəniyəti ilə də tanınır"- deyə Azərbaycanın Çexiyadakı səfiri TahirTağızadə Trend -a bildirib.
Onun sözlərinə görə, Azərbaycanla Çexiya arasında əlaqələr təkcə qarşılıqlı rəsmi səfərlərdən ibarət deyil. Ötən ilin dekabrında virtuoz pianoçu Şahin Növrəslinin Praqada solo konserti Azərbaycanın ecazkar musiqiyə və bənzərsiz mədəniyyətə maliak olduğunu nümayiş etdirdi.
"Bir il əvvəl çexlərdən Azərbaycan haqqında soruşanda deyirdilər ki, Xəzərin sahilində karbohidrogen ehtiyatları ilə zəngin bir ölkədir. Çexlər etiraf edirlər ki, onların istifadə etdikləri enerji daşıyıcılarının 25%-i Azərbaycanda işləyən konsorsiumdan gəlir" - deyən Tağızadə əlavə edib ki, səfirlik Çexiyada Azərbaycanla bağlı elmi, mədəni tədbirlərə də üstünlük verir. Onun sözlərinə görə, səfirliyin dəstəyi ilə Azərbaycanın görkəmli yazıçısı Cəlil Məmmədquluzadənin "Danabaş kəndinin əhvalatları" povesti çex dilində nəşr olunub.
Diplomat onu da bildirib ki, Azərbaycan - Çexiya arasında sıx əlaqələrə maneə törədən səbəb isə, Bakı ilə Praqa arasında birbaşa təyyarə reysinin olmamasıdır. Onun sözlərinə görə, Bakı-Praqa reysinin açılması üçün işlər görülür, Azərbaycan və Çexiya tərəfi müvafiq variantlar axtarılar: "Çexiyada təhsil alan azərbaycanlı tələbələr, iş adamları üçün ən böyük problem Bakı ilə Praqa arasında birbaşa reysin olmamasıdır. Bu problem bizi də narahat edir. Hal - hazırda həm Çexiya Hava Yolları, həm də AZAL tərəfindən vahid mövqe ondan ibarətdir ki, sərnişinlərin azlığı bu reysin açılmasına başlıca maneədir" - deyə səfir bildirib.
Müəlliflə əlaqə saxlamaq üçün elektron ünvan - [email protected]
