Rusiya, Moskva, 16 may/ Trend , müxbir R.Ağayev, N.Kirtsxaliya/ Moskva və Tbilisi Abxaziya ətrafında vəziyyətlə əlaqədar bir-birini fitnəkarlıqda və təcavüzkarlıqda ittiham edir, regiondakı gərginliyin hərbi əməliyyatların bərpasınadək artacağını istisna etmirlər.
"Rusiya sülhməramlıları hələ ki, Gürcüstan-Abxaziya münaqişə zonasında Gürcüstanın təcavüzkar niyyətlərinin qarşısını saxlayırlar. Lakin, Gürcüstan Abxaziya və Cənubi Osetiyaya hücum etdiyi halda müharibə qaçılmazdır", Rusiya eksperti Mixail Aleksandrov hesab edir.
RF Baş Qərargah rəisi Yuri Baluyevski, bu yaxınlarda Brüsseldə keçirilən Rusiya-NATO Şurasının iclasında çıxışı zamanı Alyans ölkələrini Gürcüstanın hərbiləşdirilməsinə qarşı tədbirlər görməyə çağırıb və regionda hərbi münaqişənin qaçılmaz olduğuna dair xəbərdarlıq edib. O, bunun silahlanmanın artırılmasının dayandırıldığı halda baş verəcəyini bildirib. Mayın 15-də RF Müdafiə Nazirliyinin saytında NATO-ya üzv ölkələrin Gürcüstanın göstərdiyi hərbi yardım haqqında məlumatlar dərc edilib.
"Qərb Gürcüstandakı münaqişə zonalarında sülhməramlılıq haqqında çox danışaraq, onu silahlandırır və bununla Gürcüstanın Abxaziya və Cənubi Osetiyaya qarşı müharibəyə başlaması üçün obyektiv zəmin yaradır", - MDB ölkələri İnstitutunun Qafqaz şöbəsinin rəhbəri Aleksandrov cümə günü Trend -a bildirib.
Bununla yanaşı, Aleksandrov hesab edir ki, Qərb Abxaziyaya əlavə sülhməramlı qüvvələrin daxil edilməsinə çox ağrılı reaksiya verir. "Belə aydın olur ki, "ikili" standartlardan istifadə edilir. Bir tərəfdən, Gürcüstan silahlanır, digər tərəfdən isə, Rusiya sülhməramlılarının münaqişə zonasında fəaliyyət göstərməsinə maneələr yaradılır. Bununla Qərb tərəfindən Gürcüstanın Abxaziya və Cənubi Osetiyaya qarşı müharibəyə başlaması üçün kifayət qədər güclü olmasına imkanı hazırlanır", - politoloq bildirib.
Aleksandrov Rusiya tərəfdən cavab addımlarına səbəb olacaq siyasəti çox təhlükəli hesab edir. "Ştatlar işləri bu şəkildə aparmağa davam edərlərsə, Rusiya ABŞ-a qarşı İraq üsyançıları və Əfqanıstandakı taliblərə yardım göstərməyə başlaya bilər. Beləliklə, bu Ştatların özü tərəfindən təhrik edilən soyuq müharibə dövrlərinə qayıdışdır", - o qeyd edib.
Ekspert Gürcüstanın ərazi bütövlüyünü bərpa etmək hüququna malik olduğunu hesab edir, lakin hərbi yolla yox. Belə ki, müasir beynəlxalq hüquqda ərazi bütövlüyünün bərpa edilməsinin müharibə və etik təmizlənmə kimi üsulları yolverilməzdir. Nümunə kimi, Kosovo presedentini göstərmək olar. Burada NATO qüvvələrindən Serbiyanı qoşunlarını Kosovodan çıxarmağa məcbur etmək üçün istifadə edilib.
Politoloqun rəyinə görə, Gürcüstan nə Abxaziya, nə də Cənubi Osetiya ilə ciddi danışıqlar aparmayıb. "Gürcüstanın bütün təklifləri qeyri-ciddi olub və Beriyanın planından - Gürcüstanın tərkibində Abxaziyanın muxtariyyəti planından fərqlənməyib. O, Abxaziyaya bundan artıq heç bir şey təklif edə bilməz, bu da, təbii ki, abxazlar üçün qəbuledilməzdir. Abxaziya daha geniş statusa malik olmalıdır. Gürcüstan isə, belə statusu təklif etməyib",- Aleksandrov əlavə edib.
"Gürcüstanla münasibətlərdəki gərginlik Rusiyanın özünü təcrid etməsinə, vasitəçi deyil, demokratik normaların pozucusuna və münaqişənin iştirakçı tərəfinə çevrilməsinə səbəb olacaq", - Gürcüstanın ərazi bütövlüyünün bərpası üzrə müvəqqəti parlament komissiyasının sədri Şota Malaşxiya hesab edir.
"Şimal qonşusundan (Rusiyadan - Trend -un qeydi) fərqli olaraq, Gürcüstan üçün münasibətlərin kəskinləşməsi "ağrılıdır"", - Malaşxiya Trend -a bildirib. Onun sözlərinə görə, Gürcüstan-Rusiya münasibətlərinin kəskinləşməsi ilə bağlı mənfi faktorların əksəriyyəti Moskvanın təcavüzkar hərəkətləri və Tbilisinin razılığı olmadan, Gürcüstan-Abxaziya münaqişəsi zonasında Rusiyanın sülhməramlı kontingentinin artması ilə yaranıb.
"Moskva belə hərəkətlərlə yalnız özünü açıq şəkildə Gürcüstanı dəstəkləyən beynəlxalq ictimaiyyətdən ayırmır, həm də öz ərazisində problemlər yaradır", - sədr qeyd edib. Malaşxiya bildirib ki, Tbilisi beynəlxalq qurumların yalnız bir neçə şifahi dəstəyinə deyil, həm də "real yardımın göstərilməsi səviyyəsində" dəstəyə malikdir. "Bu yardımın məqsədi yaxın vaxtlarda Gürcüstanın ərazi bütövlüyünün bərpa edilməsi olacaq ki, bu da mövcud qarşıdurmanın müsbət nəticəsidir", - o əlavə edib.
SSRİ dağıldıqdan sonra Gürcüstan SSR-in tərkibində muxtariyyət statusuna malik Abxaziya və Cənubi Osetiya öz müstəqilliyini elan ediblər. Gürcüstanın bu ərazilər üzərində nəzarəti itirməsinə gətirən hərbi münaqişədən sonra nəticəsiz sülh danışıqları aparılır. Tbilisi onlara Gürcüstanın tərkibində geniş muxtariyyət təklif edir ki, bu da separatçıları qane etmir.
Rusiya-Gürcüstan münasibətləri Tbilisinin NATO-ya daxil olmaq niyyəti ilə əlaqədar çətinləşib. Belə ki, Kreml bunu Rusiya qarşı birbaşa təhlükə kimi nəzərdən keçirir.
