Azərbaycan, Bakı, 26 may/ Trend , müxbir E.Tarıverdiyeva, R.Hafizoğlu/ Mişel Süleymanın prezidentliyi yəqin ki, ən azı bir müddətə Livanda vəziyyətin nizamlanmasını təmin edəcək. "Mişel Süleymanın Livanda yeni prezident seçilməsindən sonrakı dövrdə həyəcanlı narahatlıq dövrü, asan olmayan məcburi sabitlik vəziyyəti müşahidə olunacaq", - amerikalı politoloq Mehran Kamrava (Mehran Kamrava) hesab edir.
Son on ildə Livan ordusunun komandanı olan general Mişel Süleyman ötən bazar ölkə parlamenti tərəfindən Livanın prezidenti seçilib. Müxalifətin boykotuna görə, 2007-ci ilin sentyabrından prezidentin seçilməsi 19 dəfə təxirə salınıb və hətta mayın əvvəlində "Hizbullah" hərəkatı və hökumət arasında ciddi hərbi qarşıdurmaya səbəb olub.
Corctaun Universitetinin Beynəlxalq Elmlər Mərkəzinin direktoru Kamrava Trend -a bildirib ki, son ayda Livanda baş verən hadisələr Livan siyasətinin söykəndiyi dini razılaşma mexanizminin klassik nasazlığıdır. Ekspert bazar ertəsi elektron poçt vasitəsilə bildirib ki, Livanda müxtəlif dinlər arasında razılıqlar ilkin olaraq hələ 1930-cu ildə əldə edilib və ölkədə müxtəlif qrupların sayını nəzərə almaqla, bu gün işləmir. "Artıq bir ildir ki, biz bu razılaşma sistemində ölkə daxilində münaqişələrə gətirən nasazlıqları müşahidə edirik", - Kamrava bildirib.
Politoloqun rəyinə görə, tezliklə sülh sazişini qəbul etmiş bütün qruplar, o cümlədən "Hizbullah" arasında məcburi barışıq dövrü başlaya bilər. Belə ki, hazırda heç kim mənfi rolda çıxış etmək istəmir. Kamrava hesab edir ki, yeni prezident çəkiyə malik siyasi fiqur və "siyasi sistemin korlamadığı sonunculardan" biridir. " Ölkənin siyasi sistemində onun iştirakı, çox ehtimal ki, güzəştlərin tapılmasına gətirəcək, - Kamrava bildirib. Livanın əsas şəxslərinin tarixini izləsək, aydın olacaq ki, onlardan çoxu Livan xalqının yaddaşında məşhur şəxslər kimi qalıblar. Son nəticədə, Süleymanın prezidentliyi ilə Livanda sabitlik dövrü başlayacaq. Lakin, bu sabitliyin möhkəmliyi və dərinliyi məsələsi şübhəli qalmaqda davam edir".
" "Hizbullah" və hökumət arasında həll edilməmiş məsələlər fonunda yeni prezidentin seçilməsi Livanda uzunmüddətli sülhə gətirməyəcək", - Türkiyənin Yaxın Şərq üzrə eksperti Karagül hesab edir. "Livanda prezident seçkiləri bir daha "Hizbullah" hərəkatının siyasi gücünü göstərib", - Türkiyənin "Yeni Şəfəq" agentliyinin aparıcı politoloqu Karagül bazar ertəsi telefonla Trend -a bildirib.
Onun rəyinə görə, "Hizbullah" Livanın hərbi və siyasi gücünü əks etdirir və bu qruplaşma ordu və hökumətin həll edə bilmədiyi məsələləri yoluna qoymağa qadirdir. Ekspertin sözlərinə görə, keçirilmiş prezident seçkiləri 2005-ci ilin əvvəlində Livanın keçmiş Baş naziri Rafiq Həririnin öldürülməsindən sonra, ölkədə vəziyyətin sabitləşməsi üçün ən yaxşı addımdır.
Politoloqun rəyinə görə, Livan Yaxın Şərqdə siyasi baxımdan ən qeyri-sabit ölkədir. Lakin Livandakı bütün qruplaşmaları qane etmiş prezident seçkiləri ümumilikdə regiondakı vəziyyətə müsbət təsir göstərəcək.
Süleyman hər iki Livan düşərgəsi - qərbyönümlü hökumət və Suriya və İranın dəstəklədiyi müxalifət üçün prezident vəzifəsinə yeganə məqbul şəxs olub. Prezident seçilməsi ərəfəsində Süleyman, onun adını sabitliyin bərpa olunması ilə bağlayan həmvətənlərinə, ölkədə "razılıq və qarşılıqlı anlaşmanın" möhkəmlənməsi üzərində işləyəcəyini vəd edib.
Mayın əvvəlində Livanda hökumət qüvvələri və radikal "Hizbullah" hərəkatının üzvləri arasında toqquşmalar olub. "Hizbullah" şiə təşkilatının yaraqlıları Livanın paytaxtı Beyrutun əhəmiyyətli hissəsi üzərində nəzarəti ələ keçiriblər. Münaqişədə onlarla insan həlak olub. Qarşıdurmanı yalnız Ərəb Dövlətləri Liqasının müdaxiləsindən sonra dayandırmaq mümükün olub.
Müəlliflə əlaqə saxlamaq üçün elektron ünvan: [email protected]
