Azərbaycan, Bakı, 05 iyun/ Trend , müxbir E.Babayev/ Azərbaycanın aparıcı müxalif Ədalət Partiyası qarşıdan gələn prezident seçkisində hazırki dövlət başçısı İlham Əliyevin namizədliyini dəstəkləyə bilər. "Bu məsələ partiyanın Ali Məclisinin iyunun sonu -gələn ayın əvvəlində keçirilən iclasında müzakirə olunacaq", - deyə cümə axşamı Trend -a partiyadakı etibarlı mənbə məlumat verib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyədək Müsavat Partityasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin namizədliyi təmsil olunduqları partiyalar tərəfindən irəli sürülüb. Azərbaycan Naminə İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası hazırki dövlət başçısı İlham Əliyevin namizədliyini irəli sürmək niyyətindədir. Üç müxalifət partiyasının (Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə, seçkiləri boykot edəcəyi barədə bəyanat verib.
Mənbə bildirib ki, partiya daxilində İlham Əliyevin müdafiə olunması barədə rəy, əsasən, Dağlıq Qarabağ münaqişəsi ilə bağlı yaranmış vəziyyətdən sonra formalaşıb. Belə ki, bu yaxınlarda prezident özü də Dağlıq Qarabağ problemi ilə bağlı Azərbaycana təzyiqlərin edildiyini bildirib. Partiyada hesab edirlər ki, belə bir şəraitdə hakimiyyətin müdafiəsi və müxalifətin hakimiyyətin ətrafında birləşməsi zəruridir. Mənbənin sözlərinə görə, bundan başqa, Ədalət Partiyası prezidentin xüsusən Dağlıq Qarabağ problemi ilə bağlı aparıdığı siyasəti müdafiə edir, həmçinin, ölkə başçısının sosial proqramını da bəyənir. "Biz hesab edirik ki, Qərb bir sıra müxalifət partityalarını hakimiyyətin üzərinə qaldırmağa çalışacaq. Belə həssas məqamda Qərbin əlində alət olmaqdansa, hakimiyyəti müdafiə etmək daha düzgündür", - deyə mənbə bildirib.
Ədalət Partiyasının sədr müavini Elxan Şükürlü cümə axşamı Trend -a açıqlamasında Ali Məclisdə hakimiyyətin namizədinin müdafiəsinin müzakirə predmeti olacağını istisna etməyib. "Belə təklif olarsa, təbii ki, müzakirə ediləcək" - deyən Şükürlünün sözlərinə görə, partiyada hazırda seçki ilə bağlı yekdil rəy yoxdur. "Bir qisim seçkiyə getməməyin, digər bir qisim isə, seçkiyə öz namizədimizlə getməyin tərəfdarıdır" -söyləyən Şükürlü hakimiyyətin müdafiəsi ilə bağlı məsələyə partiya daxilində münasibətin necə olması barədə isə, şərh verməyib. O, seçki ilə bağlı yekun qərarın Ali Məclisdə aparılan müzakirələrdən sonra bəlli olacağını deməklə kifayətlənib. Şükürlü əlavə edib ki, Seçki Məcəlləsinə son əlavə və dəyişikliklərdən sonra, partiyada seçkidə öz namizədimizlə iştirakın tərəfdarı olanların sayı azalıb.
Müxalifətçi Ədalət Partiyası 1993-cü ildə yaradılıb, 1996-cu ildə ADP-yə birləşib. 2000-ci ildə "Ədalət"çilər ADP-dən ayrılaraq, partiyanın fəaliyyətini bərpa ediblər. 2001-ci ildən indiyədək Ədalət Partiyasına İlyas İsmayılov sədrlik edir. İsmayılov 2003-cü ildə Azərbaycanda keçirilmiş prezident seçkilərində prezidentliyə namizəd olub və hazırda Milli Məclisin deputatıdır. Partiya 2003-cı ilə kimi radikal siyasi kurs həyata keçirib. 2003-dən sonra "Ədalət" hakimiyyətə qarşı loyal münasibət bəsləməyə başlayıb.
Məqalə müəllifi ilə əlaqə ünvanı: [email protected]