Azərbaycan, Bakı, 13 iyun/ Trend , müxbir E.Babayev/ Müxalif "Azadlıq" blokunun qarşıdan gələn prezident seçkisini boykot edəcəyi barədə bəyanatı qurumun üzvü olan partiyaların təmsilçiləri tərəfindən tam dəstəklənmir. "Mən seçkidə iştirakın tərəfdarıyam", cümə günü Trend -a blokun üzvü, Azərbaycan Xalq Cəbhəsi Partiyası (AXCP) Ali Məclisinin sədri Qulamhüseyn Əlibəyli bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partiyasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin namizədliyi təmsil olunduqları partiyalar tərəfindən irəli sürülüb. Bundan başqa, Azərbaycan Naminə İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. Üç müxalifət partiyasının (Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə bəyanat verib.
Əlibəyli bildirib ki, boykot bəyanatı yaxın zamanlarda blokun Məclisində müzakirə ediləcək. "Fərqli fikirlərin olması təbiidir. Mən özüm seçkidə iştirakın tərəfdarıyam və öz mövqeyimi Məclisdəki çıxışım zamanı əsaslandıracağam. Ona görə də indidən bu barədə geniş danışmaq istəmirəm", - deyə o bildirib.
Məqalə müəllifi ilə əlaqə ünvanı: [email protected]
