Azərbaycan, Bakı, 17 iyun/ Trend , müxbir M.Əliyev/ Azərbaycan və Avropa İttifaqı arasında Avropa İttifaqı Yeni Qonşuluq Siyasəti çərçivəsində növbəti müzakirələr keçiriləcək. Bu barədə Trend -a çərşənbə axşamı, Avropa Komissiyasının Azərbaycandakı nümayəndəliyindən məlumat veriblər.
Görüş iyunun 20-də Brüsseldə keçiriləcək. Görüşdə qarşıdakı prezident seçkiləri, KİV ilə bağlı vəziyyət və Azərbaycanın Avropa ictimaiyyəti qarşısında götürdüyü digər öhdəliklər müzakirə ediləcək. Azərbaycan tərəfdən müzakirələrdə Azərbaycan XİN rəhbərinin müavini Mahmud Məmmədquliyev iştirak edəcək.
Azərbaycan və Avropa İttifaqı 2006-cı ilin sonunda, Aİ Yeni Qonşuluq Siyasəti çərçivəsində, fəaliyyət planı imzalayıblar. Tərəflər enerji sahəsində Əməkdaşlıq haqqında Memorandum da imzalayıblar.
Avropa Qonşuluq Siyasəti Aİ və Aİ-yə qonşu ölkələr arasında münasibətlərin möhkəmləndirilməsi, Avropa İttifaqı sərhədlərində "dost ölkələr halqasının" təhlükəsizlik və rifah zonasının yaradılması üzrə əməkdaşlığı məqsədilə, Avropa İttifaqının qonşu ölkələrə yeni yanaşmasıdır. AQS siyasət, təhlükəsizlik, iqtisadiyyat və mədəniyyət sahələrində Aİ-yə qonşu ölkələrə Aİ ilə daha sıx əməkdaşlıq imkanları vermək üçün nəzərdə tutulub.
Müəlliflə əlaqə saxlamaq üçün elektron ünvan [email protected]
