Azərbaycan, Bakı, 24 iyun/ Trend , müxbir C.Babayeva/ Azərbaycan müxalifətini təmsil edən Açıq Cəmiyyət Partiyası (ACP) və "Bakı Zaman" qəzetinin qərargahla bağlı şikayətinə iyulun birinci ongünlüyündə Apellyasiya Məhkəməsində baxılacaq. Bu barədə çərşənbə günü Trend -a ACP-nin sədr müavini Yaqub Abbasov məlumat verib.
Trend -un arayışı: ACP "Bakı Zaman" qəzeti ilə birgə İçəri Şəhərdə, Kiçik Qala küçəsi 128 ünvanında yerləşən qərargahda fəaliyyət göstərib. Qərargah ACP lideri, parlamentin keçmiş sədri Rəsul Quliyevin bacısının həyat yoldaşı İdris Quliyevə məxsusdur. Eks-spikerlə yeznəsi arasında qalmaqal yaranıb. Səbail rayon məhkəməsi İdris Quliyevin partiyanın qərargahdan çıxması ilə bağlı iddiasını təmin edib.
Abbasovun sözlərinə görə, Apellyasiya Məhkəməsinin qərarı əvvəlcədən bəllidir. "Belə ki, qərargahın icarə müqaviləsi mayın 8-də başa çatıb. Buna görə də hüquqi baxımdan ACP-nin yenidən o qərargahda qalıb fəaliyyət göstərəcəyi real deyil", - deyə Abbasov bildirib.
ACP-nin sədr müavininin sözlərinə görə, məhkəmənin qərarından sonra partiya yeni qərargah axtaracaq.
Trend -un arayışı: Sağ mərkəzçi, müxalifətyönlü ACP 2007-ci ilin aprelində təsis olunub. Partiyanın lideri Azərbaycanın eks-spikeri, hazırda mühacirətdə yaşayan Rəsul Quliyevdir. 2007-cı ilin fevralınadək ADP-nin sədri olmuş Rəsul Quliyev və onun tərəfdarları etiraz olaraq ADP-dən imtina edərək özlərinin Açıq Cəmiyyət Partiyasını yaradıblar. ACP indiyədək dövlət qeydiyyatına alınmayıb.
Məqalə müəllifi ilə əlaqə saxlamaq üçün ünvan - [email protected]