Azərbaycan, Gəncə, 25 iyun / Trend , müxbir V.Məmmədov/ Azərbaycanın Baş Narkotiklərlə Mübarizə İdarəsinin Qərb Regional Şöbəsi tərəfindən bu ilin 6 ayı ərzində qanunsuz dövriyyədən 50 kiloqramadək narkotik vasitə çıxarılıb. Bu barədə çərşənbə günü Trend -a şöbədən məlumat verilib.
Dövriyyədən çıxarılan narkotik vasitələrdən 46 kq 204 q-ı marixuana, 3 kq 500 q-ı haşiş, qalanı az miqdarda digər narkotik vasitələr olub. Altı ay ərzində yabanı halda bitən 8 kq çətənə kolu da məhv edilib.
Hesabat dövründə qərb regionunda narkotiklərlə bağlı 36 cinayət faktı aşkar olunub ki, bu da ötən ilin müvafiq dövrünə nisbətən 13 fakt çoxdur.
Şöbədən verilən məlumata görə, qeydə alınan cinayətlərdən 27-si narkotiklərin satışı, 9-u saxlanması ilə bağlıdır. Bununla bağlı 20 nəfər məsuliyyətə cəlb olunub.
Məqalə müəllifi ilə əlaqə ünvanı: [email protected]
