Türkiyənin baş prokuroru məhkəmədə hakim partiyanın bağlanması iddiasını əsaslandırıb
Azərbaycan, Bakı, 01 iyul / Trend , müxbir S.İlhamqızı/ Türkiyənin hakim Ədalət və İnkişaf Partiyasının bağlanması iddiası əsasında bu gün Konstitusiya Məhkəməsində keçirilən prosesdə baş prokuror Əbdülrəhman Yalçınkaya çıxış edib. Bu barədə Türkiyə KİV-ləri məlumat yayıb.
Dövlət ittihamçısı qismində bir saat yarım çıxış edən Yalçınkaya AKP-nin fəaliyyətinin dayandırılması üçün iddianı əsaslandırıb.
Müdafiə tərəfinin - AKP nümayəndələrinin çıxışı isə iyulun 3-də dinləniləcək. Partiya adından müdafiə çıxışını dövlət naziri, Baş nazirin müavini Cəmil Çiçək və paralmentdə AKP deputat qrpunun rəhbəri Bəkir Bozdağ edəcəklər.
Bu prosesdən sonra Konstitusiya Məhkəməsinin məruzəçisi Osman Can proseslə bağlı məlumatları və sənədləri toplayaraq iddia haqqında hesabat məruzəsi hazırlayacaq. Bu müddətdə Türkiyə Baş Prokurorluğu və AKP yazılı dəlil və müdafiələrini təqdim edəcəklər.
Məruzənin Konstitusiya Məhkəməsinin 11 nəfər üzvünə paylanmasından sonra məhkəmənin sədri Haşim Kılıç AKP-nin bağlanması iddiası ilə bağlı qərar çıxarılacaq iclasın vaxtını müəyyən edəcək.
Türkiyə Böyük Millət Məclisində təmsil olunan müxalifət partiyaları - Cümhuriyyət Xalq Partiyası və Millətçi Hərəkat Partiyası AKP-ni dünyəvilik əleyhinə çıxmaqda günahlandıraraq onun fəaliyyətinin dayandırılması tələbi ilə Konstitusiya Məhkəməsində iddia qaldırıblar.
Məqalə müəllifi ilə əlaqə saxlamaq üçün elektron ünvan [email protected]
