Azərbaycan, Bakı, 15 iyul / Trend , müxbir S.İlhamqızı/ Türkiyənin Avropa-Aralıq dənizi Parlament Assambleyasındakı (AAPA) nümayəndə heyətinin başçısı Zeynəb Dağı hesab edir ki, "Aralıq dənizi Birliyi" layihəsinin müəllifi olan Fransa Türkiyənin bölgədəki önəmini və əhəmiyyətli rolunu qəbul edib.
"Fransa prezidenti Nikola Sarkozi anlayır ki, Türkiyə Avropa və Aralıq dənizi ölkələrinin əməkdaşlığında önəmli bir ölkədir" - deyə Dağı Trend -a bildirib.
Fransanın ev sahibliyi ilə iyunun 13-14-də Parisdə "Aralıq dənizi Birliyi" sammiti keçirilib, 43 ölkənin dövlət və hökumət başçılarının qatıldığı sammitdə Türkiyənin Baş naziri Rəcəb Tayyib Ərdoğan, xarici işlər naziri Əli Babacan da iştirak edib.
Millət vəkili bildirib ki, Fransanın dövlət başçısı Sarkozi Türkiyəni Avropa Birliyindən kənarda saxlamaq üçün "Aralıq dənizi Birliyi" formatını irəli sürdü. Lakin onun bu təşəbbüsünə Türkiyə açıq şəkildə öz etirazını bildirdi, bu məsələ hətta başda Almaniya olmaqla Avropa Birliyinin bir sıra üzv dövlətləri tərəfindən də etirazla qarşılandı. Bundan sonra layihənin adında və mahiyyətində dəyişiklik edilərək "Aralıq dənizi üçün Birlik" adlandırıldı və Türkiyə üçün yaranmış problem də ortadan qalxdı.
Dağı əlavə edib ki, çoxsaylı etiraz reaksiyaları Sarkozini Türkiyə əleyhinə planları dəyişməyə vadar etdi və nəhayət, Sarkozi Türkiyə dövlətinin əhəmiyyətinə vardı. "Fransa artıq başa düşür ki, Türkiyə böyük sayda müsəlman toplumuna malik dünyəvi, demokratik ölkədir və onun gücünə göz yummaq olmaz", - deyə millət vəkili bildirib.
Onun fikrincə, "Aralıq dənizi üçün Birlik" formatı Türkiyəni təcrid edən, kənarda saxlayan yox, əksinə tərkibinə daxil edən bir layihədir.
Türkiyəli politoloq Akif Emre isə hesab edir ki, Fransanın Aralıq dənizi ölkələri üçün qurmağa çalışdığı bu birlik AB-yə üzv olmağı qarşısına məqsəd qoymuş Türkiyəni maraqlandırmır.
"Fransa prezidenti Sarkozi bu birliyi yaradarkən əslində Türkiyəyə qarşı oyun oynamaq istəyirdi. Türkiyəni Aralıq dənizi Birliyinə qatmaqla Avropa Birliyindən uzaqlaşdırmağa çalışırdı. Lakin bu niyyəti baş tutmadı", - deyə ekspert Trend -a bildirib.
Politoloq hesab edir ki, yeni birliyin perspektivi yoxdur və Aralıq dənizi ölkələri arasında əməkdaşlığa heç bir töhfə verməyəcək. Çünki ərəb ölkələri ilə İsrail arasında hər hansı əməkdaşlıq mövcud deyil, əksinə, konfliktlər davam etməkdədir "İsrail bu birilkdə təmsil ounduğu üçün bu formatın heç bir uğurlu nəticəsi ola bilməz", - deyə Emre bildirib.
Türkiyənin Baş naziri Ərdoğan "Aralıq dənizi üçün Birlik" barədə bildirib ki, bu qurum Türkiyənin Avropa Birliyinə daxil olması üçün qətiyyən alternativ olmayacaq.
Avropa Birliyi Komissiyasının "Barselona prosesi: Aralıq dənizi üçün birlik" layihəsinin təmsilçisi Benita Ferrero-Waldner də bildirib ki, bu layihə Türkiyənin AB-yə üzvlüyünə qarşı yönəlməyib.
"Aralıq dənizi üçün Birlik" layihəsinin məqsədi Aralıq dənizi ölkələri ilə Avropa arasında əməkdaşlığı artırmaqdır.
Məqalə müəllifi ilə əlaqə saxlamaq üçün elektron ünvan [email protected]
