Azərbaycan, Bakı, 06 avqust / Trend , müxbir E.Babayev/ Müxalif Azərbaycan Milli İstiqlal Partiyası (AMİP) seçkidə öz namizədi ilə çıxış etməyəcək. "AMİP lideri Etibar Məmmədov seçkidə öz namizədliyini irəli sürməkdən imtina edib. Hazırda partiyada hər hansı başqa bir şəxs öz namizədliyini irəli sürmək istəmir", çərşənbə günü Trend -a AMİP-in sədr müavini Əli Orucov bildirib.
Trend -un arayışı: Azərbaycanda prezident seçkiləri oktyabrın 15-də keçiriləcək. AMİP lideri Məmmədov ötən həftə seçkidə öz namizədliyini irəli sürmək niyyətində olmadığını bildirib. Məmmədov AMİP-dən digər bir şəxs namizədliyini verəcəyi halda, onu müdafiə edəcəyini vurğulayıb.
Orucov bildirib ki, AMİP istənilən halda seçkini boykot etməyəcək. "Çünki bizim partiyanın qurultayının seçkidə iştirak qərarı var. Bu qərarı dəyişmək üçün yenidən qurultay keçirilməlildir və indiki halda bu mümkün deyil", - deyən Orucov bildirib ki, yaranmış bu vəziyyətdə AMİP-in hansı qərar verəcəyi hələlik qeyri-müəyyəndir. "Avqustun 9-da AMİP-in Siyasi Şurası keçiriləcək. Şura seçkidə iştirakın forması ilə bağlı son qərar veərəcək", - deyə o əlavə edib.
AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004-cü ilin sonunadək sədri olan Məmmədov hazırda Beynəlxalq Demokrat İttifaqının (BDİ) sədr müavinidir.
Məqalə müəllifi ilə əlaqə ünvanı: [email protected]
