Azərbaycan, Bakı, 14 avqust / Trend , müxbir E.Babayev/ Hakim Yeni Azərbaycan Partiyası (YAP) hesab edir ki, prezident seçkilərində iştirakdan imtina ənənəvi müxalifət daxilində ciddi fəsadların yaranmasına təkan verib.
"Bu proses müxalifətin daha da zəifləməsi ilə nəticələnəcək və artıq bunu müşahidə etməkdəyik",- cümə axşamı Trend -a YAP Siyasi Şurasının üzvü, millət vəkili Aydın Mirzəzadə son vaxtlar seçkidə iştirakdan imtina edən partiyalarda müşahidə olunan bəzi istefaları şərh edərkən bildirib.
Trend -un arayışı: Azərbaycanda prezident seçkisi oktyabrın 15- də keçiriləcək. Üç müxalifət partiyasının (Xalq Cəbhəsi, Liberal, Vətəndaş və İnkişaf) təmsil olunduğu "Azadlıq" bloku, Klassik Xalq Cəbhəsi, Açıq Cəmiyyət, Müsavat, Vətəndaş Həmrəyliyi, Demokrat, Böyük Quruluş, Azadlıq partiyaları, o cümlədən "Azərbaycan Naminə" İctimai Forumun rəhbəri Eldar Namazov seçkidə iştirakdan imtina ediblər.
Bundan sonra AXCP Ali Məclisinin sədri Qulamhüseyn Əlibəyli bu partiyadan istefa verib və prezident seçkilərində iştirak etmək üçün namizədliyini irəli sürüb. Həmçinin, AXCP və Müsavatın bir sıra rayon təşkilatlarında istefaların olması barədə bəyanatlar yayılıb.
Mirzəzadə bəyan edib ki, seçkidə iştirakdan imtina müxalifət partiyalarında ciddi qarşıdurmalarla müşahidə ediləcək.
"AXCP Ali Məclisinin sədri Qulamhüseyn Əlibəylinin istefası və seçkiyə fərdi şəkildə qoşulması da bunun əyani göstəricisidir. Ənənəvi müxalifətin daxilində seçkidə iştirakla bağlı ciddi fikir ayrılığı mövcuddur. Seçkidə iştirakdan imtina ilə ənənəvi müxalifət öz üzərindən xətt çəkmiş olub" - deyən Mirzəzadənin sözlərinə görə, hazırda müxalifət iki qrupa bölünüb. Bunlardan birincisi 90 - cı illərin əvvəlində yaranan və Heydər Əliyev siyasətinə müxalifətdə olan qrupdur. Digəri isə, ənənəvi müxalifətin daxilindən çıxan və yeni siyasi kurs götürən, yeni müxalifət adı ilə siyasi səhnəyə daxil olan qrupdur. Onun fikrincə, indiki proseslər ikinci qrupun güclənməsi ilə nəticələnəcək və 2010- cu il parlament seçkilərinə qədər ənənəvi müxalifət daha da zəif duruma düşəcək. "Həmin vaxtadək qarşımızda indiki Milli İstiqlal Partiyası (AMİP) kimi zəifləmiş Müsavatı, Xalq Cəbhəsini, Demokrat partiyalarını görəcəyik" - deyə o əlavə edib.
Müxalif Azərbaycan Demokrat Partiyası (ADP) isə bəyan edib ki, seçkidə iştirak etməmək müxalifətdə ciddi itkilərlə müşahidə edilməyəcək.
"Əksinə, müxalifətin seçkidə iştirakı bu düşərgənin demokratik düşüncəsinə zidd olardı və müxalifətin mövqeyini xeyli zəiflədərdi", - deyə ADP sədri Sərdar Cəlaloğlu Trend -a bildirib. Onun sözlərinə görə, həmişə seçkilərdən qabaq və sonra müxalifətdən itkilərin olması qabardılır və bu istiqamətdə kampaniya aparılır. Prezident seçkilərində iştirak etməməyin müxalifətin 2010 - cu il parlament seçkilərinə hazırlığına da heç bir təsiri olmayacaq. Əsaslı dəyişilmələr olmasa, növbəti seçkilərin də heç bir əhəmiyyəti olmayacaq" -deyə o əlavə edib.
Məqalə müəllifi ilə əlaqə ünvanı: [email protected]
