...

Əfqanıstanın təkcə Ğəzni vilayətində 20 min narkoman var

Siyasət Materials 4 Sentyabr 2008 12:05

Trend-i buradan izləyin

Əfqanıstan, Kabil, 04 sentyabr / Trend , A.Həkimi / Əfqanıstanın mərkəzi vilayətlərindən biri sayılan Ğəznidə 20 min nəfərdən çox narkotik maddə istifadəçisi var.

Bu barədə Ğəzni vilayətinin Nakomanları Müalicə Mərkəzinin rəhbəri Həmidullah Camal məlumat verib. Camal Trend -un Əfqanıstandakı müxbirinə bildirib ki, BMT-nin Nakotiklərlə Mübarizə İdarəsinin 2005-ci ilin statistik məlumatlarına əsasən, Əfqanıstanın bu vilayətində nakotik maddələrə aludə olmuş şəxslərin sayı getdikcə artmaqdadır.

Onun sözlərinə görə, nakotik maddə istifadəçilərinin 17 min nəfəri Ğəzni vilayətinin ətraf şəhərlərində, 3 min nəfəri isə mərkəzində yaşayır. Bu şəxslər heroin, tiryək, və digər narkotik maddələrdən istifadə edirlər. Onların 80 faizini kişilər, 13 faizini qadınlar və 7 faizini isə yaşı 13-dən az olan uşaqlar təşkil edir.

Camal qeyd edib ki, Ğəzni vilyətinin Nakomanları Müalicə Mərkəzi ayda orta hesabla 20 nəfəri müalicə etmək gücünə malikdir. O əlavə edib ki, il yarım ərzində burada 320 nəfərə yaxın narkoman müalicə alıb.

Əfqanıstanın Ğəzni vilayətində narkotik maddələr əkilmir, lakin bura narkotik maddə alverçilərinin tranzit yolu olduğundan əhali bu dəhşətli bəladan yaxa qurtara bilməyib.

Ğəzni vilayətinin Narkotiklərlə Mübarizə İdarəsini sədri Gül Məhəmməd Trend -a bildirib ki, 2005-ci ildən indiyədək aparılan əməliyyatlar nəticəsində ümumilikdə, heroin maddəsinin hazırlanması üçün istifadə edilən 2500 kiloqram maye və dondurulmuş kimyəvi maddə polis tərəfindən aşkarlanaraq götürülüb. Məhəmməd əlavə edib ki, son həftə ərzində isə Qəndəhar-Kabil magistral yolunda Ğəzni polisi tərəfindən aparılan əməliyyat zamanı 188 kiloqram narkotik maddə aşkarlanaraq götürülüb. Ümumilikdə isə onun sözlərinə görə, indiyədək polis əməkdaşları tərəfindən 14 tondan çox narkotik maddə saxlanılıb.

Ekspertlər belə hesab edirlər ki, Əfqanıstanda tüğyan edən narkomaniya adlı bu fəlakətin səbəbi ölkədə qruplar arasında baş verən toqquşmalarla, güclü idarəçiliyin olmaması və yerli rəhbər şəxslərin narkotiklərlə mübarizəyə ciddi yanaşmaması ilə bağlıdır ki, bu da narkotik maddələrin əkilməsi, satılması və istifadəsinin geniş yayılmasında mühüm amillərdəndir.

Əfqanıstan hökuməti tərəfindən Narkotiklərlə Mübarizə İdarəsinin yaradılmasına baxmayaraq, ötən 4 il ərzində müxtəlif səbəblərdən bu idarənin öz fəaliyyətini lazımınca qura bilməməsi və işini yaxşı yerinə yetirə bilməməsi səbəbindən isə ölkədə narkomanların sayı getdikcə artmaqda davam edir.

Müəlliflə əlaqə saxlamaq üçün elektron ünvan [email protected]

Xəbər lenti

Xəbər lenti