Azərbaycan, Bakı, 03 oktyabr / Trend , müxbir A.Hüseynbala/ Azərbaycanın müxalif Müsavat Partiyası Azərbaycan Demokrat Partiyası ilə hansısa blokda birləşməsini mümkün saymır.
"Müxalifətdə olan siyasi partiyaların əməkdaşlığını və imkan daxilində müttəfiqliyini dəstəkləyirik, ancaq yaxın zamanlarda bizim Azərbaycan Demokrat Partiyası ilə hansısa blokda birləşməyimiz real görünmür", - cümə günü Trend - a Müsavat Partiyası Mərkəzi İcra Aparatının rəhbəri Arif Hacılı bildirib.
Trend - News - un arayışı: Azərbaycan müxalifətini təmsil edən Demokrat Partiaysının sədri Sərdar Cəlaloğlu müxalif qüvvələrin 2009 - cu il bələdiyyə və 2010 - cu il parlament seçkiləri ilə bağlı blok yaratmasını vacib hesab edib. Seçkidə iştirak etməyən müxalifətyönlü ADP 5 müxalifət partiyasının yaratdığı əməkdaşlıq mərkəzinə qatılmaqdan imtina edib. Sərdar Cəlaloğlu Müsavatla ADP - nin belə bir blok yaratmaqla bağlı mövqeyinin üst - üstə düşdüyünü bildirib. O vurğulayıb ki, hər iki partiya yaxın dövrlərdə bu mövqenin reallaşdırılması istiqamətində müzakirələrə başlayacaq.
Hacılı ADP - nin prezident seçkilərinə münasibətinin Müsavatdan tamamilə fərqli olduğunu qeyd edib.
"Bütövlükdə Azərbaycan hakimiyyətinin siyasəti ilə əlaqədar ADP - nin mövqeyi Müsavat Partiyasının mövqeyindən əsaslı surətdə fərqlənir. Bu fərq o qədərdir ki, iki partiyanın müttəfiqliyi mümkün deyil", - Hacılı bildirib
Müsavatın Mərkəzi İcra Aparatının rəhbəri, yalnız iki partiyanın siyasətində daha yaxın çalarlar aşkara çıxdığı təqdirldə əməkdaşlığı, hətta ciddi blok yaradılmasını mümkün hesab edir.
Müsavat Partiyası 1911 - ci ilin oktyabrında Bakıda yaradılıb. Müsavat Partiyasının III (Bərpa) Qurultayı 1992 - ci il noyabrın 7 - də Bakıda Respublika sarayında keçirilib. Gizli səsvermənin yekunları əsasında İsa Qəmbər əksəriyyət səslə Müsavat Partiyasının başqanı seçilib.
Məqalə müəllifi ilə əlaqə ünvanı: [email protected]
