Azərbaycan, Bakı, 10 oktyabr / Trend müxbir A.Hüseynbala/ Azərbaycanın müxalifət deputat qrupunun üzvü Pənah Hüseyn prezident seçkisindən sonra müxaliftəin yeni əməkdaşlıq mərkəzlərinin, yeni blokların yaradılacağını istisna etmir.
"Mövqeləri üst - üstə düşməyən müxalifət qüvvələri əməkdaşlıq etməyəcəklər. İndiki formatın əvəzlənməsi də gözləniləndir" - deputat cümə günü Trend - a bildirib.
Trend - un arayışı: Azərbaycanda prezident seçkisi oktyabrın 15-də keçiriləcək. Prezident seçkisində yeddi namizəd - Yeni Azərbaycan Partiyasının (YAP) sədri, indiki dövlət rəhbəri İlham Əliyev, müxalif Ümid Pariyasının sədri İqbal Ağazadə, Böyük Quruluş Partiyasının sədri Fazil Qəzənfəroğlu, Bütöv Azərbaycan Xalq Cəbhəsi Partiyasının sədri Qüdrət Həsənquliyev, Müasir Müsavat Partiyasının sədri Hafiz Hacıyev, Azərbaycan Liberal Demokrat Partiyasının sədri Fuad Əliyev və müstəqil namizəd Qulamhüseyn Əlibəyli iştirak edəcək.
Sentyabrın əvvəlində "Azadlıq" blokuna daxil olan partiyalar - Xalq Cəbhəsi, Liberal Partiya, Vətəndaş və İnkişaf partiyası, Müsavat Partiyası və "Azərbaycan Naminə" İctimai Forum prezident seçkisinin nəticələrini tanımamaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri - legitim elan edilib.
Hüseyn deyib ki, Azərbaycan iqtidarının apardığı daxili siyasi kurs və hadisələrin inkişaf tendensiyası müxalifətin total şəkildə birləşməsini tələb edir.
"Demokratik müxalifətin bir araya gəlməsi və öz resurslarını koordinasiya etməsi, ən azı fundamental ilkin demokratik dəyərlərin qorunub saxlanması, cəmiyyətin demokratik potensialının, müqavimət gücünün qorunub saxlanması, artırılması istiqamətində fəaliyyət tələb edir. İndi müxalifət böhran vəziyyətindədir və bu, sonsuz ola bilməz. Ona görə demokratik qüvvələrin daha aktiv şəkildə meydana çıxıb müqavimət göstərməsini gözləmək lazımdır. 2008 - ci il seçkisi ən mühüm mərhələ deyil. Müxalifət üçün 2009 və 2010 - cu illər daha ciddi, daha mühüm mərhələ olacaq. Bu mərhələyə hazırlaşmaq üçün müxalifət indidən bir çox mühüm məsələləri həll etməlidlir" - Hüseyn əlavə edib.
Onun sözlərinə görə, müxalifətin ilk addımı demokratik olmayan mühitdə seçkilərə münasibət olmalıdır.
"2009 və 2010 - cu il seçkilərində iştirak etmək haqqında müsbət qərar qəbul olunarsa, yeni bir taktika tələbi ortaya çıxacaq. Boykot xətti bir mövqe olsa da, mən bunu daha az səmərəli hesab edirəm. Demokratik və azad seçkilər nəticəsində formalaşmayan hakimiyyətə münasibət məsələsi də müzakirə olunmalıdır. Hər halda, bu, real bir hakimiyyətdir və qanun çərçivəsində fəaliyyət göstərən siyasi qüvvələr də məsələni nəzərə almalıdırlar" - Hüseyn vurğulayıb.
Deputatın fikrincə, Müxalifətin Əməkdaşlıq Mərkəzinin seçkini boykot etmək qərarı təyinatlı olsa da, tamamilə əsassız və təsirsiz ötüşməyib.
"Azərbaycanda real müxalifət adına iddia edən siyasi qüvvələrin mütləq əksəriyyət prezident seçkisində namizəd irəli sürməməklə, indiki hakimiyyətin siyasi kursunu, daxisi siyasi vəziyyəti və seçkilərin azad və demokratik keçirilməməsinə etirazını bildirib. İndiki şəraitdə bu məqbul hesab olundu. Bu da bir siyasi mövqedir. Bu baxımdan, mən heç də boykot qərarını əhəmiyyətsiz hesab etmirəm. Əminəm ki, hakimiyyət bunun təsirini görəcək", - Hüseyn qeyd edib.
Məqalə müəllifi ilə əlaqə ünvanı: [email protected]
