Azərbaycan, Bakı, 12 noyabr/ Trend , müxbir A.Hüseynbala/ Azərbaycanın iqtidaryönlü Demokratik Azərbaycan Dünyası Partiyası (DADP) sədrinin birinci müavini Mirkazım Seyidov vəzifəsindən gedib.
"Partiyanın sədri Məmməd Əlizadə ilə görüşüb vəzifəmdən çıxarılmağım haqda ərizə vermişəm. İstefa verməsəm də, hazırda partiya ilə heç bir əlaqəm yoxdur", - çərşənbə günü Trend -a DADP sədrinin keçmiş birinci müavini bildirib.
Trend -un arayışı: Ötən həftə partiya sədrinin müavinləri və bir neçə rayon təşkilatının üzvləri sədrə etiraz edərək partiyadan çıxıblar. İstefa verənlər sədr Məmməd Əlizadənin partiyanın Nizamnaməsini kobud şəkildə pozduğunu iddia edirlər. İddiaçılar sədrin Siyasi Şura və İdarə Heyətində müzakirə olunmadan səlahiyyətlərinə aid olmayan qərarlar verdiyini bildiriblər.
Seyidovun sözlərinə görə, vəzifəsindən getməsinin səbəbi bir qrup şəxsin partiyanın rəhbərliyindən narazı qalaraq istefa vermələri ilə bağlı deyil: "Düşünürəm ki, Əlizadə sədr kimi partiya daxilində yaranan narazılığın səbəblərini araşdırmalı idi. Bunu etməyibsə, istefa verənlər düzgün addım atıblar. Ona görə günah Əlizadənin özündədir", - keçmiş birinci müavin deyib.
"Partiyadan azad olunanlar pozuculuq fəaliyyəti ilə məşğul olanlar idi", - çərşənbə günü Trend -a DADP sədri Əlizadə bildirib.
Onun sözlərinə görə, birinci müavini partiya daxilindəki bəzi məqamlarla razılaşmadığından vəzifəsindən çıxarılması üçün ərizə verib: "Amma ərizəsini qəbul etməmişəm. Seyidovla görüşəndən sonra ərizəsini qəbul edib-etməyəcəyimi müəyyənləşdirəcəyəm", - Əlizadə vurğulayıb.
Trend -un arayışı: Hakimiyyətyönlü Demokratik Azərbaycan Dünyası Partiyası (DADP) 1992-ci ildə təsis olunub və 1993-cü ildə Ədliyyə Nazirliyi tərəfindən dövlət qeydiyyatına alınıb. Təşkilata Məmməd Əlizadə rəhbərlik edir. Partiya 1993-cü ildə hakimiyyətə gələn Yeni Azərbaycan Partiyasının siyasətini dəstəkləyir.
1999-cu ildə yaradılan və müxalifəti təmsil edən Böyük Millət Partiyası (BMP) 2008-ci il sentyabrın 23-də DADP ilə birləşib. Lakin BMP keçmiş sədri Samir Adıgözəlli dünən DADP sədrinin siyasətinə etiraz olaraq partiyadan çıxdığını bəyan edib.
DADR iqtidaryönlü partiyaların 1998-ci ildə yaratdığığı Məşvərət Məclisinin üzvüdür. Qurumda hakim Yeni Azərbaycan Partiyası, Demokratik Azərbaycan Dünyası Partiyası, Demokratik Maarifçilik Partiyası, Azad Respublikaçılar Partiyası, Respublikaçılar Partiyası, Ana Vətən Partiyası, Sosial Rifah Partiyası, Milli Dövlətçilik Partiyası, Azərbaycan Naminə Alyans Partiyası təmsil olunur. Hazırda Nizamnamədə təsbit olunmuş rotasiyaya uyğun olaraq Məşəvərət Məclisinə sədrlik Yeni Azərbaycan Partiyasına həvalə olunub.
Məqalə müəllifi ilə əlaqə ünvanı: [email protected]
