Azərbaycan, Bakı, 26 noyabr/ Trend , müxbir R.Novruzov/ Avropa İttifaqı (Aİ) "Şərq tərəfdaşlığı" proqramı çərçivəsində viza rejimini sadələşdirməyə hazırlaşır.
"Aİ bunun viza rejiminin ləğvi və ya pulsuz viza təqdim edilməsi olub-olmayacağı barədə hələ qərar qəbul etməyib", - deyə çərşənbə günü jurnalistlərə Avropa Komissiyasının Azərbaycandakı nümayəndəliyinin rəhbəri Alan Vaddams bildirib.
Aİ Azərbaycanda miqrasiya siyasətini sadələşdirməyə hazırlaşır. Bunun üçün Bakıda viza mərkəzləri açılacaq, bu mərkəzlər Avropa İttifaqı ölkələrinə viza alınması prosesinin sürətləndirilməsi və sadələşdirilməsinə kömək edəcək. Bu gün Aİ ölkələrinə vizanın dəyəri 20-50 avro aralığında dəyişir, ərizə verilən andan vizanın hazırlanma müddəti iki həftə sürür.
Polşa və İsveç mayın 26-da Aİ-nin xarici işlər nazirlərinə şərq qonşuları üçün vahid forumun - "Şərq tərəfdaşlığı"nın yaradılması təklifini təqdim edib. Onun tərkibinə Aİ-nin 27 dövləti, həmçinin Ukrayna, Moldova, Gürcüstan, Azərbaycan və Ermənistan da daxil olacaq. Bu təşkilat çərçivəsində vizaların ləğvi, azad ticarət zonalarının tətbiqi, strateji sazişlərin bağlanması üzrə danışıqlar aparılacaq.
Məqalə müəllifi ilə əlaqə ünvanı: [email protected]
