Azərbaycan, Bakı, 11 dekabr/ Trend , müxbir S.Ağayeva/ Bu gün Azərbaycanda hakimiyyət-müxalifət ittifaqının yaradılması barədə təkliflərin real əsası yoxdur, - Azərbaycan prezidenti İcra Aparatının şöbə müdiri hesab edir.
"Hakim elita ölkədəki siyasi prosesin iştirakçıları ilə istənilən məsələ üzrə əməkdaşlığa daim açıqdır", - Azərbaycan prezidenti İcra Aparatının Siyasi Təhlil və İnformasiya Təminatı Şöbəsinin müdiri Elnur Aslanov cümə axşamı Trend -a bildirib.
Azərbaycanın müxalifət partiyaлары ümummilli məsələlərin müzakirəsi üçün hakimiyyət-müxalifət əməkdaşlığı ittifaqının yaradılması təklifi ilə çıxış edib.
Hələ 2003 - cü ildə Prezident İlham Əliyev müxalifətə hakim elita və əks-elita arasında konstruktiv qarşılıqlı münasibətlərin yaradılmasına yönəlmiş dialoq təklif edib, - Aslanov deyib. Onun sözlərinə görə, sonralar hakim partiya dəfələrlə dialoq təklifləri ilə çıxış etsə də, bəzi müxalifət liderlərində rasional baxışlar və yanaşmaların olmaması belə dialoqun realizəsinə imkan verməyib.
"Bu gün belə ittifaqın yaradılması təklifinin real əsası yoxdur, belə təcrübə hökumətin formalaşdırılması üçün koalisiyanın zəruri olduğu parlament idarəçiliyinin tətbiq edildiyi ölkələrdə səmərəlidir", - Aslanov deyib. Bu gün Azərbaycanda inkişaf naminə rasional rəqabət aparacaq yeni, konstruktiv müxalifət mühitinin formalaşdırılmasından danışmaq lazımdır, - şöbə müdiri hesab edir.
Ölkədə islahatlar dəqiq strateji proqrama müvafiq olaraq aparılır, ümummilli məsələləri isə, yalnız ölkədə real siyasi çəkisi olan siyasi qruplarla müzakirə etmək olar, - Aslanov güman edir. Onun sözlərinə görə, dünya təcrübəsində belə ittifaq nümunələri olsa da, bu, böhranlı vəziyyətdən çıxış üçün zəruri olan iqtisadi və siyasi tədbirlər proqramından ibarətdir.
"Belə vəziyyətin yoxluğu bu ittifaqla bağlı təklifləri əsassız edir. Belə təşəbbüslər ictimai dəstək və sosial bazalarını itirmiş partiyaların simalarını saxlamağa cəhd amili olmamalıdır. Bəzi partiyalar belə sualları cəmiyyətə ünvanlamaqla, sadəcə, bir qədər də üzdə qalmaq istəyirlər", - Aslanov bildirib.
Müəlliflə əlaqə saxlamaq üçün elektron ünvan: [email protected]