Azərbaycan, Bakı, 19 yanvar / Trend , A.Hüseynbala/ Azərbaycanın iqtidaryönlü partiyası referendumla bağlı ayrıca təşviqat qrupu yaratmayacaq.
"Məsləhətləşmələr nəticəsində hakim Yeni Azərbaycan Partiyasının təsis etdiyi "Yeni Azərbaycan" təşviqat qrupu ilə birgə referendumla bağlı təbliğat kampaniyasında iştirak etmək qərarına gəlmişik", - bazar ertəsi Trend -a Ana Vətən Partiyasının sədri, millət vəkili Fəzail Ağamalı bildirib.
Trend -un arayışı: Azərbaycanın hakim partiyası "Yeni Azərbaycan", müxalif Müsavat Partiyası "Respublikaçılar" referendum üzrə təşəbbüs qrupları yaradıblar. YAP-ın təşəbbüs qrupu yanvarın 14-də imza vərəqələrini qeydə alınmaq üçün Mərkəzi Seçki Komissiyasına təqdim edib.
Bundan əlavə, "Azadlıq" blokuna daxil olan Xalq Cəbhəsi, Milli Birlik Hərəkatı, Vətəndaş və İnkişaf partiyaları, o cümlədən "Azərbaycan Naminə" İctimai Birlik, Demokrat Partiyası və bir sıra qeyri-hökumət təşkilatları "Qarabağ və Respublika Uğrunda Vətəndaş Hərəkatı", Klassik Xalq Cəbhəsi, Azadlıq, Milli Demokrat, Böyük Azərbaycan və Xalq patiyalarının təmsil olunduğu Demokratiya Uğrunda İttifaq "Azərbaycan Xalq Cümhuriyyəti", Azərbaycan Milli İstiqlal Partiyası isə "Milli İstiqlal" təşəbbüs qrupunun yaradılması barədə qərar verib.
Hakim partiyanın icra katibinin müavini Mübariz Qurbanlı daha öncə Trend -a bildirib ki, müxalifət partiyalarının referendum əleyhinə yaratdıqları təşəbbüs qrupları effektsiz olacaq.
Azərbaycan parlamenti ötən ayın sonunda keçirilən iclasında Konstitusiyaya əlavələr və dəyişikliklər edilməsi ilə bağlı referendumun martın 18-də keçirilməsi barədə qərar qəbul edib.
Konstitusiyanın 29 maddəsinə dəyişiklik edilməsinə dair referendumun keçirilməsi barədə qərar verilib.
Azərbaycan Respublikası Konstitusiyasının mətninə dəyişikliklər yalnız referendum vasitəsilə daxil edilə bilər (maddə 152). AR Konstitusiyasının mətninə dəyişikliklər Milli Məclis və ya prezident tərəfindən təklif edilirsə, o zaman təklif edilən dəyişikliklər üzrə əvvəlcədən AR Konstitusiya Məhkəməsinin qərarı alınmalıdır (maddə 153).
Ağamalının sözlərinə görə, partiyanın həmin kampaniyada iştirak edəcək üzvlərinin adları da müəyyənləşdirilib: "Biz hakim partiyanın referendumla bağlı keçirəcəyi bütün kütləvi aksiyalarda da yaxından iştirak edəcəyik", - millət vəkili əlavə edib.
Hakimiyyətyönlü AVP 1991-ci ildə yaradılıb. Partiya parlamentdə iki deputatla təmsil olunub.
Məqalə müəllifi ilə əlaqə ünvanı: [email protected]
