Azərbaycan, Bakı, 21 yanvar / Trend , müxbir S.Kazımlı/ Ötən il Azərbaycanda insan alveri ilə bağlı cinayətlərin sayı artıb.
Daxili İşlər Nazirliyinin Baş Əməliyyat və Statistik İnformasiya İdarəsinin məlumatına görə, 2008-ci ildə insan alveri ilə bağlı 394 fakt qeydə alınıb ki, bu da 2007-ci illə müqayisədə 111 fakt çoxdur.
Bu növ cinayətlərin 193-ü qadınlara qarşı törədilib. Qadınlara qarşı törədilən insan alveri cinayətlərinə görə 349 nəfər məsuliyyətə cəlb olunub. Həmin cinayətləri törədənlərin 56,2 faizi (196-sı) qadınlar olub.
Hesabat dövründə fahişəliyə cəlb etmə və ya əxlaqsız yuvaları saxlama cinayəti 100 fakt, narkotik vasitələrin və psixotrop maddələrin qanunsuz dövriyyəsi ilə bağlı cinayətlər isə 359 fakt artıb.
Ümumilikdə ötən il respublikada 21692 (2007-ci illə müqayisədə 16,2% artıq), o cümlədən daxili işlər orqanları tərəfindən 20799 cinayət qeydə alınıb.
DİN sistemi üzrə qeydə alınmış cinayətlərin 45,8%-i böyük ictimai təhlükə törətməyən, 43,3%-i az ağır, 10,9%-i ağır və xüsusilə ağır cinayətlər olub.
Qeydə alınmış cinayətlərin
7689-u şəxsiyyət əleyhinə, 5880-i iqtisadi
sahədə törədilən, 6413-ü ictimai
təhlükəsizlik və ictimai qayda əleyhinə, 817-si
dövlət hakimiyyəti əleyhinə olan
cinayətlərdir.
Qeydiyyata alınmış hər 2 cinayətdən 1-i az ağır, hər 6-sı oğurluq, hər 7-si narkotik vasitə və psixotrop maddələrin qanunsuz dövriyyəsi ilə bağlı olub.
2008-ci ildə 13715 şəxs cinayət məsuliyyətinə cəlb edilib, onlardan 1829-u qadın, 392-i yetkinlik yaşına çatmayan, 11524-ü işləməyən və oxumayan, 1539-u əvvəllər məhkum edilmişlər olub.
Məqalə müəllifi ilə əlaqə ünvanı: [email protected]
