Azərbaycan, Bakı, 10 fevral / Trend , müxbir A.Hüseynbala/ Azərbaycanda referendumla bağlı təsis edilən təşviqat qrupunun tərkibində başqa bir təşviqat qrupu təmsil oluna bilməz.
"Bundan əlavə həm "Qarabağ və Respublika Uğrunda Hərəkat", həm də "Respublikaçılar" təşviqat qrupları qarşılıqlı həmtəsisçilərdir. Belə olan halda bizim təsis etdiyimiz təşviqat qrupunun hərəkata qoşulması mümkün deyil", - çərşənbə axşamı Trend -a Demokratiya Uğrunda Hərəkatın (DUİ) təsis etdiyi "Azərbaycan Xalq Cümhuriyyəti" təşviqat qrupunda təmsil olunan Klassik Xalq Cəbhəsi Partiyasının (KXCP) sədri Mirmahmud Mirəlioğlu bildirib.
Trend - un arayışı: "Qarabağ və Respublika Uğrunda Hərəkat" ötən həftə təmsil olunmaq üçün Demokratiya Uğrunda Hərəkatın (DUİ) təsis etdiyi "Azərbaycan Xalq Cümhuriyyəti" təşviqat qrupuna dəvət gondərib.
Azərbaycanda 2008 - ci ilin oktyabr ayında keçirilən prezident seçkisindən sonra prezident seçkisinin nəticələrini tanımayan Müxalifətin Əməkdaşlıq Mərkəzində təmsil olunan Müsavat və Azərbaycan Xalq Cəbhəsi partiyaları müxalifətin gələcək əməkdaşlığını nəzərdə tutan layihələr hazırlayıblar.
Seçkidən sonra müxalifətin daha geniş koalisiyada birləşməsi istiqamətində danışıqlar başlasa da, qarşılıqlı ittihamlar nəticəsində hələ də müxalifətin geniş koalisiyasının yaranması baş tutmur.
Müxalifətin Əməkdaşlıq Mərkəzinə "Azadlıq" bloku (Azərbaycan Xalq Cəbhəsi, Liberal, Vətəndaş və İnkişaf partiyaları), Müsavat Partiyası və "Azərbaycan Naminə" İctimai Forum (ANİF) daxildir.
Mirəlioğlunun sözlərinə görə, təşviqat qrupları təsis olunan zaman qarşılıqlı əməkdaşlığın mümkünlüyü haqda açıqlama verilib. "Bizim hərəkata qoşulmağımıza gəldikdə, "Qarabağ və Respublika Uğrunda Hərəkat" ayrıca təşviqat qrupudur və Mərkəzi Seçki Komissiyasından həmin quruma imza vərəqələri verilib. MSK-dan imza vərəqələri alan "Azərbaycan Xalq Cümhuriyyəti" təşviqat qrupunun hərəkata qoşulması məntiqi cəhətdən düzgün deyil", - KXCP sədri əlavə edib.
Müxalifətin gələcək birgə əməkdaşlığına gəldikdə, KXCP sədri deyib ki, "Azadlı" blokuna və DUİ-yə daxil olan, eləcə də Azərbaycan Demokrat, Milli İstiqlal, Müsavat və digər siyasi qurumların fevralın 11-də keçirilən forumunda bu məsələ ətraflı müzakirə olunacaq. "Həmin toplantıda müxalifətin daha güclü siyasi bloklaşmasına nail olmaq üçün addımlar müəyyənləşdiriləcək", - Mirəlioğlu qeyd edib.
Onun sözlərinə görə, KXCP forumda müxalifətin MSK-da təsis etdiyi bir təşviqat qrupu qeydiyyatdan keçərsə, digər siyasi qurumların hamısının həmin qrup çərçivəsində referendumla bağlı əməkdaşlıq etməsini təklif edəcək.
Dеmоkrаtiyа Uğrunda İttifаqı 2005-ci il parlamеnt seçkisindən sonra müxalifətçi Klassık Xalq Cəbhəsi, Azadlıq və Milli Demokratiya partiyaları yаrаdıb. 2008-ci il sеntyаbrın əvvəllərində Böyük Azərbаycаn, nоyаbr аyındа isə Хаlq pаrtiyаlаrı DUİ-yə üzv qəbul оlunub. İttifаq bu pаrtiyaların məşvərət və əməkdaşlıq qurumudur.
Məqalə müəllifi ilə əlaqə ünvanı:[email protected]