Azərbaycan, Bakı, 17 iyun /müxbir Trend C.Babayeva/ Marksizm-Leninizm platformasında Azərbaycan Kommunist Partiyası payızda keçirilməsi nəzərdə tutulan Sol qüvvələrin Forumunun cəmiyyətdə solçu ideyaları təbliğ edəcəyinə şübhə edir.
"Bir forumla solçu ideyaların yayılması və hamıya çatdırılması absurddur. Azərbaycanda solçu ideyaların təbliği zəif və istənilən səviyyədə deyil. Əsil təbliğat üçün internet və mətbuat kimi müasir təbliğat forma və metodlardan istifadə olunmalıdır", çərşənbə günü Trend -a Marksizm-Leninizm platformasında Azərbaycan Kommunist Partiyasının sədri Telman Nurullayev bildirib.
Trend -un arayışı: Azərbaycanın bəzi solçu partiyaları payızda Solçu qüvvələrin ümumrespublika forumunu keçirmək niyyətindədirlər. Forumun keçirilməsi üzrə təşkilat komitəsində Xalq Sosialist, Kommunist və Azərbaycanın Solçu Demokrat Partiyası təmsil olunur.
Təşkilat komitəsində Marksizm-Leninizm platformasında Azərbaycan Kommunist Partiyası da təmsil olunsa da, sonradan Forumda iştirakdan imtina edib. Forum təşkilatçıları partiyanın imtina etməsi səbəbini öz gücünə əmin olmamsı ilə əlaqələndiriblər.
Nurullayev Forumun təşkilat komitəsində təmsil olunmaqdan imtina etməsini təşkilatçıların ayrıseçkiliyi ilə əlaqələndirib. "Forumda iştirak etməklə bağlı bizə müraciət olundu. Bir şərtlə razılıq verdik ki, Forumda sol düşərgənin bütün spektri iştirak etsin. Təşkilatçılar partiyalar arasında ayrıseçkilik etdilər və buna görə də iştirakdan imtina etdik", partiya sədri deyib.
Sədri olduğu partiyasnın öz gücünə əmin olmaması ittihamlarına gəlincə, Nurullayev bildirib ki, hansı partiyanın güclü olacağını tarix göstərəcək. "Partiyamızın böyük tarixi var və fəaliyyəti göz qabağındadır. Mətbu orqanı və Beynəlxalq Kommunist Hərəkatında çəkisi olan yeganə sol partiyayıq", o deyib.
Məqalə müəllifi ilə əlaqə ünvanı: [email protected]
