Azərbaycan, Bakı, 25 avqust / Trend , müxbir C.Babayeva /
Müxalif Azərbaycan Milli İstiqlal Partiyası (AMİP) bələdiyyə seçkisi ilə bağlı komissiya yaradıb.
"Partiya katibliyinin iclasında Bələdiyyə Komissiyasının yaradılması barədə qərar qəbul olunub. Yeddi nəfərdən ibarət olan komissiyanın yaradılmasında məqsəd bələdiyyə seçkisi ilə bağlı fəaliyyəti aktivləşdirməkdən ibarətdir", - çərşənbə axşamı Trend -a AMİP-in mətbuat və təbliğat katibi Əli Orucov bildirib.
Trend -un arayışı: Azərbaycanda bələdiyyə seçkisinin bu ilin dekabr ayının ortalarında keçirilməsi gözlənilir.
Orucovun sözlərinə görə, bələdiyyə seçkisi ilə bağlı fəaliyyətin intensivləşdirilməsi istiqamətində növbəti mərhələdə bu həftənin sonunda partiyanın Siyasi Şurasının iclasının keçirilməsi nəzərdə tutulub. "Partiya bələdiyyə seçkisinə start verilənə qədər hazırlıq işlərini yekunlaşdırmağı nəzərdə tutur", - AMİP rəsmisi deyib.
Onun sözlərinə görə, partiyanın rayon təşkilatlarının bələdiyyə seçkisinə bir o qədər həvəsli olmaması qarşıya çıxacaq əngəllərdən biri olacaq. "Rayon təşkilatlarının bələdiyyə seçkisi ilə bağlı müəyyən narahatlıqları var. Onlar hesab edirlər ki, paytaxta nisbətən regionlarda yerli icra orqanları seçkiyə açıq şəkildə müdaxilə edirlər. Lakin bütün çətinliklərə baxmayaraq, partiya rəhbərliyi rayon təşkilatlarını seçkidə fəal iştiraka təşviq edəcək", - Orucov deyib.
Trend -un arayışı: АMİP 1992-ci ildə yаrаdılаn və Аzərbаycаndа ilk dövlət qеydiyyаtınа аlınаn pаrtiyаdır. Etibar Məmmədov 2004-cü ilin sonunda partiyanın sədrliyindən istefa verdikdən sonra partiya daxilində parçalanma baş verib. Bundan sonra AMİP-in sədri olan Əli Əliyevə qarşı partiya daxilində narazılıq yarandığı zaman partiya üzvlərinin bir qismi AMİP-dən gediblər. Məmmədоv hаzırdа Bеynəlxаlq Dеmоkrаt İttifаqının (BDİ) sədr müаvinidir.
Məqalə müəllifi ilə əlaqə ünvanı: [email protected]
