Azərbaycan, Bakı, 23 iyun /Trend, müxbir T.Hacıyev/
Azərbaycanın müxalif Müsavat Partiyasının siyasi partiyalara qarşı apardığı "qara piar" kampaniyası bu partiyanın seçkiqabağı taktikasının tərkib hissəsidir. Bunu çərşənbə günü Trend-ə müxalif Demokrat Partiyasının sədri Sərdar Cəlaloğlu bildirib.
"Müsavat Partiyasının siyasi partiyalara qarşı apardığı "qara piar" kampaniyası bu partiyanın seçkiqabağı taktikasının tərkib hissəsidir. Məqsəd də mümkün qədər Müsavatı müxalifətdən kənarda saxlamaq, onu müxalifət üstü bir güc kimi təqdim eləmək, yeganə, həqiqi, saf, prinsipial, radikal müxalifət obrazı yaratmaq və bununla da narazı elektoratı məhz Müsavat Partiyasına səs verməyə cəlb etməkdir", - Cəlaloğlu deyib.
ADP sədrinin sözlərinə görə, bu taktikanı həyata keçirmək üçün müsavatçılar müxtəlif partiyalara, müxtəlif liderlərə qarşı ən müxtəlif "piar" aparılır.
"İlk olaraq bu kampaniya İqbal Ağazadədən (Ümid Partiyasının sədri) başladı, sonra Lalə Şövkətə (Liberal Partiyasının lideri), daha sonra Əli Əliyevə (Vətəndaş və İnkişaf Partiyasının sədri) keçdi. Bunlar düşünürlər ki, başqa müxalifət partiyalarını nə qədər nüfuzdan salsalar, nə qədər həqiqi bir müxalifət qüvvəsi kimi təqdim etməsələr, bir o qədər Müsavat daha müxalif, daha radikal, daha qüsursuz, iqtidarla bəlli bir məsafədə olan partiya kimi görünə bilər. Bu kampaniyanın mahiyyəti bundan ibarətdir", - Cəlaloğlu deyib.
ADP sədri Müsavat Partiyasına qarşı hər hansı haqsızlıq etmədiyini deyib.
"Sadəcə olaraq Seçki Məcəlləsi ilə bağlı müxalifətin birgə mövqeyinin ortaya qoyulması barədə tədbir təşkil etmişdik. Müsavat başqanı İsa Qəmbər də demişdi ki, "baxaq, lazım gələrsə iştirak edərik". Sabahı gün İsa Qəmbər dedi ki, biz o tədbirdə iştirak etmirik. İstəyirik ki, Seçki Məcəlləsi ilə bağlı ayrıca münasibət bildirək. AXCP sədri Əli Kərimli də dedi ki, əgər Müsavat iştirak etməyəcəksə, onda bu müxalifətin vahid mövqeyi olmayacaq. Təklif olundu ki, hər bir partiya ayrı-ayrılıqda Seçki Məcəlləsinə münasibət bildirsin. Həmin vaxt mənə mətbuat sual verdi ki, niyə tədbir alınmadı, mən də dedim ki, Müsavat iştirak etmədiyi üçün bu tədbir alınmadı. Bunu Müsavat Partiyası özünə qarşı "qara piar" kimi dəyərləndirib və buna görə də bu hücumu mənə qarşı təşkil eləyiblər", - Cəlaloğlu bildirib.
Müsavat Partiyasının Mərkəzi İcra Aparatının rəhbəri Arif Hacılı isə Trend-ə açıqlamasında deyib ki, Cəlaloğlunun son 7-8 ay ərzində açıqlamalarının əksəriyyəti Müsavat Partiyasına, onun başqanına, Müsavat Partiyasının siyasətinə qarşı yönəlib.
"O ,istənilən hadisədə, istənilən prosesdə yalnız Müsavat başqanını ittiham etmək mövqeyini tutur. Bu, təəssüf doğurur. Sərdar Cəlaloğlunun hamını bir yerə toplamaq cəhdi baş tutmayıb. Bu məsələdə o, nahaq yerə Müsavatı günahlandırır. Müsavat Demokratiya Uğrunda İttifaqa daxil olan partiyalarla birlikdə Seçki Məcəlləsinə edilən dəyişikliklərə münasibət bildirib. Cəlaloğlu bu prosesdə iştirak etmək arzusunda idi. Onun bu istəyi baş tutmadı. Onun bu cəhdi uğursuzluqla nəticələndi. Təəssüf ki, Cəlaloğlu da bir sıra qüvvələr kimi öz uğursuzluqlarının səbəblərini özündə yox, Müsavat Partiyasında axtarmaq xəttini götürüb. Bu da Sərdar Cəlaloğlunu çıxılmaz vəziyyətə aparır", - Hacılı əlavə edib.
Hacılı ADP sədri ilə məsləhətləşmələr apardığını da gizlətməyib.
"Cəlaloğlu ilə söhbətim olub. Heç bir şərt irəli sürmədən Müsavatla ADP arasında əməkdaşlıq məsələsinin müzakirəsinə hazır olduğumuzu bildirmişik. Ancaq Cəlaloğlu konstruktiv mövqe tutmayıb. Hər hansı danışıqlar olacaqsa, burada mütləq Ümid Partiyasının da iştirak etməsinin zəruriliyini irəli sürüb", - Müsavat funksioneri qeyd edib.
