Azərbaycan, Bakı, 27 oktyabr /Trend, müxbir S.Süleymanov/
Astana və Bakı qardaşlaşmış şəhərlər ola bilər, - Azərbaycanın Qazaxıstandakı yeni fövqəladə və səlahiyyətli səfiri Zakir Həşimov belə hesab edir.
"Azərbaycanla Qazaxıstan arasında əməkdaşlıq strateji tərəfdaşlıq üzərində qurulur, ona görə də iki ölkənin paytaxtları - Astana və Bakı arasında əməkdaşlığın möhkəmləndirilməsi üçün hər cür əsas, həm də bu əməkdaşlığı daha yüksək səviyyəyə keçirmək üçün hər cür zəmin var", - səfir Trend-ə bildirib.
Diplomatın sözlərinə görə, o, çərşənbə günü Qazaxıstan paytaxtının hakimi (qubernatoru) İkmanqali Tasmaqabetova Astana və Bakının qardaşlaşmış şəhərlər elan edilməsi təklifi ilə müraciət etmək fikrindədir. Həşimovun fikrincə, əməkdaşlığın belə forması mədəni mübadilə üçün iki paytaxtın biznes-strukturları arasında əməkdaşlığın genişləndirilməsi üçün əsas ola bilər.
"Məlum olduğu kimi, paytaxtlarda mədəni həyat həmişə çox dolğun və maraqlıdır. Mənim fikrimcə, Qazaxıstan və Azərbaycanın münasibətləri və əlaqələrinin möhkəmlənməsinə kömək edəcək məhz belə əlaqələri fəal şəkildə qurmaq lazımdır", - səfir qeyd edib.
Qazaxıstandakı Azərbaycan icmasının sayı 300 mindən çoxdur. Təkcə Astanada 30 min azərbaycanlı yaşayır. Azərbaycan icmasının əsas hissəsini sovet dövründə repressiyaya məruz qalmış ailələr təşkil edir.
Qazaxıstanla Azərbaycan arasında əməkdaşlığın ənənəvi sahələri qazax neftinin və neft məhsullarının Bakı - Qara dəniz nəqliyyat dəhlizi ilə nəqlidir. Həmçinin, iki ölkə arasında bərə əlaqəsi də var. Azərbaycan da, Qazaxıstan da TRACECA (Avropa-Qafqaz-Asiya) nəqliyyat dəhlizinin iştirakçılarıdır.
Həşimov bir az əvvəl Trend-ə müsahibəsində bir çox digər sahələrdə də əməkdaşlığın perspektivlərinin mövcud olduğunu bildirib.
"Azərbaycan və Qazaxıstan xalqları qardaşdır, onları tarixi köklər birləşdirir", - səfir deyib. - "Bunun nəticəsi olaraq, bütün sahələrdə - mədəni, humanitar, iqtisadi, siyasi sahələrdə əməkdaşlıq üçün nəhəng potensial mövcuddur".