Sentyabrın 8-də Azərbaycan Respublikasının Prezidenti İlham Əliyev Abşeron rayonunda "Azərsu" Açıq Səhmdar Cəmiyyətinin (ASC) Ceyranbatan ultrasüzgəcli sutəmizləyici qurğusunun təməlqoyma mərasimində iştirak edib.
Trend-in məlumatına görə, dövlətimizin başçısı əvvəlcə ərazi ilə yaxından tanış oldu.
"Azərsu" ASC-nin kollektivinin nümayəndələri və inşaatçılar Prezident İlham Əliyevi hərarətlə qarşıladılar.
Dövlətimizin başçısına yeni tikiləcək qurğunun texniki göstəriciləri barədə məlumat verildi. Bildirildi ki, Bakı və Sumqayıt şəhərlərinə verilən suyun keyfiyyət göstəricilərinin dünya standartlarına uyğunlaşdırılması məqsədilə tikiləcək qurğunun məhsuldarlığı saniyədə 6 kubmetr olacaqdır. Burada emal olunacaq su Dünya Səhiyyə Təşkilatının standartlarına cavab verəcəkdir. Yeni qurğuda Niderland Krallığının istehsalı olan müasir avadanlıqdan istifadə olunacaq.
Qeyd edildi ki, 12-15 ay müddətində inşa ediləcək və məhdud işçi heyətlə tam avtomatik rejimdə idarə olunacaq yeni qurğu elektrik enerjisinə qənaət etməyə imkan verəcəkdir. İstehlakçılara öz axımı ilə çatdırılması üçün yeni qurğuda emal olunacaq su dəniz səviyyəsindən 190 metr hündürlükdə yerləşən anbara ötürüləcək və buradan Abşeronun bütün ərazilərinə paylanacaq.
Məlumat verildi ki, "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı" na əsasən qurğunun inşası ilə yanaşı, burada təmizlənəcək suyu istehlakçılara çatdırmaq üçün yeni magistral kəmərlər, paylayıcı şəbəkə və anbarların tikilməsi nəzərdə tutulur. Dövlət Proqramına uyğun olaraq, Masazır, Binəqədi, Balaxanı, Ramana və Dübəndi qəsəbələrində yeni su anbarları kompleksinin inşası planlaşdırılır. Bu anbarlardan istifadə etməklə Bakıətrafı qəsəbə və kəndlərin su təchizatını əsasən özüaxımlı rejimdə təmin etmək mümkün olacaq.
Azərbaycan Prezidenti Bakı şəhəri və ətraf qəsəbələrin su təchizatının perspektiv planına da baxdı.
Sonra dövlətimizin başçısı metal gilizi bünövrəyə buraxdı və beton qarışığı tökən qurğunu işə saldı.
Prezident İlham Əliyev "Azərsu" ASC-nin kollektivinin nümayəndələri və inşaatçılarla görüşdü.
Ceyranbatan Su Kəmərləri İdarəsinin kollektivi adından çıxış edən Yazgül Rüstəmova Prezident İlham Əliyevə təşəkkür etdi.
Sonda xatirə şəkli çəkdirildi.
İlham Əliyev Ceyranbatan ultrasüzgəcli sutəmizləyici qurğusunun təməlqoyma mərasimində iştirak edib (FOTO)
Sentyabrın 8-də Azərbaycan Respublikasının Prezidenti İlham Əliyev Abşeron rayonunda "Azərsu" Açıq Səhmdar Cəmiyyətinin (ASC) Ceyranbatan ultrasüzgəcli sutəmizləyici qurğusunun təməlqoyma mərasimində iştirak edib
