Azərbaycan Respublikasının Prezidenti İlham Əliyev sentyabrın 14-də Monteneqronun ölkəmizdə yeni təyin olunmuş fövqəladə və səlahiyyətli səfiri Ramo Braliçin etimadnaməsini qəbul edib.
Səfir fəxri qarovul dəstəsinin qarşısından keçdi.
Diplomat Ramo Braliç etimadnaməsini Prezident İlham Əliyevə təqdim etdi.
Sonra Azərbaycan Prezidenti İlham Əliyev səfirlə söhbət etdi.
Dövlətimizin başçısı Azərbaycan Respublikası ilə Monteneqro Respublikası arasında əlaqələrin genişləndirilməsi üçün yaxşı imkanların olduğunu vurğuladı. Prezident İlham Əliyev ölkələrimiz arasında ikitərəfli münasibətlərin daha da inkişaf etdirilməsi üçün yüksək səviyyəli qarşılıqlı səfərlərin önəmini qeyd etdi. Dövlətimizin başçısı səfir Ramo Braliçin ölkəmizdəki diplomatik fəaliyyətinin əlaqələrimizin daha da möhkəmləndirilməsi işinə xidmət edəcəyinə əminliyini bildirdi.
Azərbaycan Respublikası ilə Monteneqro Respublikasının dost dövlətlər olduğunu vurğulayan səfir Ramo Braliç ölkələrimiz arasında əməkdaşlıq üçün yaxşı potensialın mövcudluğunu qeyd etdi. O, səfir kimi Azərbaycan Respublikası ilə Monteneqro Respublikası arasında ikitərəfli əlaqələrin genişləndirilməsi işində səylərini əsirgəməyəcəyini bildirdi.
Trend-in ən mühüm və maraqlı xəbərlərini "Telegram"da izləyin
