Rufiz Hafizoğlu, Trend-in Yaxın Şərq redaksiyasının rəhbəri
Türkiyənin Baş naziri Rəcəb Tayyib Ərdoğanın Misir səfəri hər iki ölkənin mediasında ərəb-türk birliyinin və regionda vahid gücün yaranmasının başlanğıcı kimi qələmə verilsə də, Misirin ən böyük islamçı müxalifətinin bəyanatı bu ittifaqın gələcəkdə bir o qədər də uğurlu olmayacağını deməyə əsas verir.
Baş nazir Ərdoğan Misir televiziyasına verdiyi açıqlamada 25 yanvar inqilabının ölkədə demokratiya və insan azadlığının təmin edilməsi üçün böyük təkan olduğunu bildirdi.
"Mən inanıram ki, misirlilər bu keçid dövründə demokratiyaya üstünlük verəcəklər. Hesab edirəm ki, dünyəvilik dinsizlik deyil, əksinə bütün dinlərə hörmət və ehtiramla yanaşmaq deməkdir. Ümidvaram ki, Misirdə yeni dünyəvi konstitusiya qəbul ediləcək", - Ərdoğan bildirib.
Məhz Baş nazirin bu açıqlaması "Müsəlman qardaşlar" tərəfindən elə də xoş qarşılanmadı və islamçılar misirlilərin "İslamın xilaskarı" adlandırdığı Ərdoğana ölkənin daxili işlərinə qarışmamağı tövsiyə etdilər.
"Müsəlman qardaşlar" təşkilatının sözçüsü Mahmud Qəzlan Türkiyə demokratiyasının və siyasi sisteminin eynilə Misirə tətbiq edilməsinin qeyri-mümkün olduğunu bildirdi.
Əslində, "Müsəlman qardaşlar"ın bu bəyanatı bir daha onu göstərir ki, siyasi və iqtisadi sahədə Misir və Türkiyə arasında əməkdaşlıq olsa da, islamçılar Fəthullah Gülən və Nəcməddin Ərbəkan siyasi düşüncəsindən formalaşan Türkiyə islam modelinin ərəb dünyasına sirayət etməsinin qəti əleyhinədirlər.
Lakin Hüsni Mübarəkin devrilməsindən sonra Misirdəki "Müsəlman qardaşlar"ın gələcək siyasi karyera üçün Türkiyə siyasi islam modelindən istifadə edəcəyi ehtimal edilirdi.
Hətta 25 yanvar inqilabından sonra "Müsəlman qardaşlar"ın siyasi qolu olaraq təsis edilən Azadlıq və Ədalət Partiyası əslində Türkiyənin Ədalət və İnkişaf Partiyasının Misir variantı kimi yaradılmışdı.
Maraqlıdır, bəs nə üçün Türkiyədən ilham alınaraq təsis edilən siyasi partiya bu gün Ərdoğanın demokratiya və dünyəvilik haqqından söylədiklərindən belə narahatdır?
Misir daxilində son zamanlar baş verən hadisələri diqqətlə izlədikdə görmək olar ki, bu gün "Müsəlman qardaşlar" ərəb dünyasında və xüsusən də Misirdə özlərinə heç bir siyasi alternativ görmürlər.
Ölkədəki siyasi boşluq və digər siyasi partiyaların bir o qədər də söz sahibi olmaması "Müsəlman qardaşlar"ın daha da fəallaşması ilə nəticələnib.
"Müsəlman qardaşlar"ın Ərdoğanın bəyanatından narahat olmalarının əsas səbəblərindən biri də gələcəkdə parçalanma ehtimalının olmasıdır.
Maraqlı olsa da, "Müsəlman qardaşlar"ın vahid sistem olaraq qalmaları və siyasi baxımdan elə də parçalanmamalarının əsas səbəbi onlara qarşı ciddi təzyiqlərin olmasıdır.
Ölkədə yeni demokratik sistemin yaranması isə istər-istəməz təşkilatın gələcək fəaliyyətinə təsir edəcək.
Məhz ehtimal edilən parçalanmanın qarşısını almaq üçün "Müsəlman qardaşlar" Ərdoğanın bəyanatına sərt şəkildə etiraz ediblər.
Misirdə noyabr ayında seçkilərin baş tutacağı təqdirdə "Müsəlmaq qardaşlar"ın hakimiyyətə gələcəyi artıq istisna edilmir. Hakimiyyətə gələcəkləri təqdirdə isə "Müsəlman qardaşlar"ın simasında region uğrunda türk-ərəb rəqabətinin başlanacağı gəzlənilir.
