Azərbaycan, Bakı, 24 noyabr /Trend müxbir T.Cəfərov/
Avropa İttifaqının iqtisadi məsələlər üzrə müşaviri Mehrdad Emadi hesab edir ki, Avropa ölkələri İran neftindən yalnız qısa müddətə imtina edə bilərlər.
"Hazırda bazarda neft təchizatında artımlar var. Britaniyadan başqa digər Avropa ölkələrində neft və qaz ehtiyatları yüksək səviyyədədir. Bu səbəbdən qarşıdan gələn 6 ay və ya bir il üçün Avropa ölkələri İran neftinə qarşı sanksiyalar tətbiq edərək onu almaqdan imtina edə bilərlər, lakin bu, uzun müddət üçün gözlənilən deyil", - Emadi Trend-ə müsahibəsində bildirib.
"Reuters" agentliyinin məlumatına əsasən, Fransa Xarici İşlər Nazirliyinin sözçüsü Bernar Valero çərşənbə axşamı bildirib ki, rəsmi Paris İran Mərkəzi Bankına və ölkənin neft satışına qarşı geniştərkibli sanksiyalar tətbiq edilməsi ilə bağlı öz müttəfiqləri ilə danışıqlar aparır. "Rəsmi Paris düşünür ki, İrana qarşı sərt sanksiyalar tətbiq olunmalıdır ki, İslam Respublikası strateji qərar qəbul edərək danışıqlara qoşulsun və beynəlxalq öhdəliklərini yerinə yetirsin", - Valero deyib.
Emadinin fikrincə, Avropa ölkələrinin İranın neft sektoruna tətbiq edəcəyi sanksiyalar neftin qiymətini artıracaq.
Müşavir sanksiyaların hər iki tərəfə ziyan vuracağı qənaətindədir.
"Sanksiyalar hər iki tərəfə ziyan vurur. Bir tərəfdən Aİ-nin biznes vahidlərinə və ixrac sektoruna, digər tərəfdən İran iqtisadiyyatına daha mərkəzləşmiş formada zərər vurur", - Emadi çərşənbə günü Londondan telefonla Trend-ə bildirib.
O, əlavə edib ki, son bir il ərzində İranın müxtəlif sahələrdə fəaliyyətləri ilə bağlı verilən hesabatlar Avropa İttifaqının üç önəmli ölkəsi - Almaniya, Fransa və Britaniyanı çox narahat edir.
Emadinin fikrincə, Avropa ölkələrinin narahatlıqlarının artmasına digər səbəb isə İranın hərbi komandirlərinin bəzi çıxışlarıdır.
ABŞ və Qərb İranı nüvə silahı yaratmağa çalışmaqda ittiham edib. İran isə uranın zənginləşdirilməsində məqsədin nüvə-elektrik stansiyalarını yanacaqla təmin etmək olduğunu bildirib. BMT Təhlükəsizlik Şurası indiyədək İranın nüvə proqramının həssas sahələrini, o cümlədən uranın zənginləşdirilməsi prosesini dayandırmaq üçün bu ölkəyə qarşı 4 dövr sanksiya və 6 qətnamə qəbul edib. Sonuncu - 1929 saylı qətnamə 2010-cu ilin iyun ayında qəbul olunub. Avropa İttifaqı və ABŞ da birbaşa İrana qarşı sərt sanksiyalar tətbiq ediblər.
Beynəlxalq KİV-lərin məlumatına əsasən, Avropa İttifaqının xarici işlər nazirlərinin dekabrın 1-də keçiriləcək iclasında Aİ İranın 200 rəsmisi və müxtəlif şirkətlərinə qarşı yeni sanksiyalar tətbiq etmək istəyir. Aİ İrana qarşı bu ölkənin nüvə proqramında qaranlıq məqamların olması və İranın beynəlxalq ictimaiyyətlə əməkdaşlığını artırmağa təşviq etmək məqsədi ilə təzyiq göstərdiyini bildirir.
