Azərbaycan, Bakı, 1 dekabr /Trend/
Prezident İlham Əliyev bir sıra dövlətlərin başçılarına təbrik məktubu ünvanlayıb.
Azərbaycan Prezidenti Laos Prezidenti Çoummali Sayasoneni bu ölkənin milli bayramı Respublika günü münasibətilə təbrik edib.
"Milli bayramınız - Respublika günü münasibətilə Sizi və bütün xalqınızı öz adımdan və Azərbaycan xalqı adından ürəkdən təbrik edirəm. Ümidvaram ki, Azərbaycan ilə Laos arasındakı dostluq və əməkdaşlıq münasibətlərinin inkişafı daim xalqlarımızın mənafelərinə xidmət edəcəkdir", - məktubda deyilir.
Dövlət başçısı bu əlamətdar gündə Çoummali Sayasoneyə möhkəm cansağlığı, işlərində uğurlar, dost Laos xalqına əmin-amanlıq və rifah diləyib.
İlham Əliyev Birləşmiş Ərəb Əmirliklərinin prezidenti şeyx Xəlifə bin Zayed Al Nəhyana ölkənin milli bayramı - Müstəqillik günü münasibətilə təbrik məktubu ünvanlayıb.
"Birləşmiş Ərəb Əmirliklərinin milli bayramı - Müstəqillik günü münasibətilə Sizə və Sizin simanızda bütün xalqınıza öz adımdan və Azərbaycan xalqı adından ən səmimi təbriklərimizi və xoş arzularımızı yetirirəm. Əminəm ki, ölkələrimiz və xalqlarımız arasındakı dostluq münasibətlərinin, qarşılıqlı faydalı əməkdaşlığımızın dərinləşdirilməsi istiqamətində bundan sonra da ardıcıl səylər göstərəcəyik", - təbrikdə deyilir.
Azərbaycan Prezidenti bu xoş gündə şeyx Xəlifə bin Zayed Al Nəhyana Allah Təaladan möhkəm cansağlığı, işlərində uğurlar, Birləşmiş Ərəb Əmirliklərinin qardaş xalqına daim əmin-amanlıq və firavanlıq diləyib.
Prezident İlham Əliyev Birləşmiş Ərəb Əmirliklərinin vitse-prezidenti, baş naziri, Dubay Əmiri şeyx Məhəmməd bin Rəşid Al Məktuma ölkənin Müstəqillik günü münasibətilə təbrik məktubu ünvanlayıb.
"Birləşmiş Ərəb Əmirliklərinin Müstəqillik günü münasibətilə Sizi və xalqınızı ürəkdən təbrik edirəm. Ümidvaram ki, Azərbaycan Respublikası ilə Birləşmiş Ərəb Əmirlikləri arasındakı möhkəm dostluq və sıx əməkdaşlıq münasibətləri xalqlarımızın mənafeyinə uyğun olaraq bundan sonra daha da inkişaf edəcək və genişlənəcəkdir", - məktubda deyilir.
Dövlət başçısı şeyx Məhəmməd bin Rəşid Al Məktuma ən xoş arzularını yetirib, qardaş xalqına sülh və rifah diləyib.
Prezident İlham Əliyev bəzi dövlətlərin başçılarını təbrik edib
Prezident İlham Əliyev bir sıra dövlətlərin başçılarına təbrik məktubu ünvanlayıb.
