Azərbaycan, Bakı, 22 mart /Trend, müxbir R. Hafizoğlu/
Terrorçu Kürd Fəhlə Partiyasının (PKK) silahı yerə qoyaraq ölkəni tərk etməsi regionun iqtisadi inkişafına təkan verə bilər. Bu barədə Trend-ə türkiyəli ekspert Nevzat Çiçək bildirib.
Onun sözlərinə görə, bölgədə terrorçu PKK təşkilatının mövcudluğu regionun iqtisadi inkişafına əngəl olan amillərdən başlıcasıdır.
Martın 21 də Türkiyənin Diyarbəkirdə keçirilən Novruz şənlikləri zamanı PKK-nın həbsdə olan lideri Abdullah Öcalan müraciət edərək təşkilata silahları yerə qoyaraq Türkiyə ərazisini tərk etmək barədə göstəriş verib.
Abdullah Öcalanın müraciətindən sonra Türkiyənin Baş naziri Rəcəp Tayyip Ərdoğan Abdullah Öcalanın müraciətinin region üçün faydalı ola biləcəyini açıqlayıb.
Çiçək onu da qeyd edib ki, Türkiyənin Anadolu bölgəsi bir çox iqtisadi layihələrin həyata keçirildiyi bölgədir və PKK-nın ölkədən çıxacağı təqdirdə bu ərazidə bir sıra yeni iqtisadi layihələrin reallaşdırıması mümkündür.
"PKK-nın bölgədən çəkiləcəyi təqdirdə Türkiyə qonşu dövlətlərlə, xüsusən də İraq və gələcəkdə Suriya ilə iqtisadi layihələrin reallaşdırılmasına imza ata bilər" - Çiçək bildirib.
Çiçək hesab edir ki, sülh prosesinin baş tutması regiondakı iqtisadi layihələrlə yanaşı dövlət büdcəsinə də müsbət təsir edəcək.
"Türkiyə bu vaxta qədər terrorla mübarizəyə 300 milyard dollar vəsait xərcləyib", - Çiçək bildirib. Onun sözlərinə görə, əgər sülh müqaviləsi reallaşarsa, terrorla mübarizə məqsədilə xərclənəcək məbləğ ölkə büdcəsində qala bilər.