...

Elşad İskəndərov İranda bir sıra görüşlər keçirib (FOTO)

Siyasət Materials 16 Sentyabr 2013 08:38 (UTC +04:00)
Dini Qurumlarla İş üzrə Dövlət Komitəsinin (DQİDK) sədri Elşad İskəndərovun İran İslam Respublikasına işgüzar səfəri çərçivəsində bir sıra görüşlər keçirib.
Elşad İskəndərov İranda bir sıra görüşlər keçirib (FOTO)

Azərbaycan, Bakı, 16 sentyabr /Trend/

Dini Qurumlarla İş üzrə Dövlət Komitəsinin (DQİDK) sədri Elşad İskəndərovun İran İslam Respublikasına işgüzar səfəri çərçivəsində bir sıra görüşlər keçirib.

DQİDK-dan Trend-ə verilən məlumata görə, Komitə sədri İranın yeni mədəniyyət və islami irşad naziri Əli Cənnəti, İran ali dini liderinin müşaviri, ayətullah Əli Təsxiri, Prezidentin müşaviri, İslam Mədəniyyəti və Beynəlxalq Əlaqələr Təşkilatının sədri M.Xürrəmşadla görüşüb.

Dostluq və qarşılıqlı hörmət şəraitində keçən görüşlərdə dini, mənəvi-mədəni, elmi sahələrdə İran-Azərbaycan əlaqələrinin mövcud durumu, onların inkişaf perspektivləri müzakirə edilib, İran və Azərbaycan arasında bu sahədə olan problemlər və onların aradan qaldırılması yolları üzrə fikir mübadiləsi aparılıb. Görüşlər zamanı dini və mənəvi-mədəni sahələrə aid, həmçinin ortaq tariximizdən irəli gələn mövzularda, ölkələrimizin qanunlarına hörmət, ortaq dəyərlərmizin qorunması və ölkələrarası münasibətlərin möhkəmləndirilməsi prinsipləri çərçivəsində Dövlət Komitəsi ilə İranın müvafiq qurumları arasında konstruktiv əməkdaşlığın aparılması istiqamətində konkret razılıqlar əldə edilib.

DQİDK sədri İranın rəsmi şəxslərinə Azərbaycanda dövlətin İslam dininin dəyərlərinə göstərdiyi qayğı haqqında ətraflı məlumat verib, müstəqillik dövründə Azərbaycanda məscidlərin sayının 17-dən 1800-dək yüksəldiyini, son 10 ildə 200-dən artıq məscidin inşa və bərpa olunduğunu, bu sahədə Azərbaycan Prezidenti İlham Əliyevin təşəbbüslərini xüsusi vurgulayıb.

Görüşlərdə diqqət mərkəzində olan əsas məsələlər sırasında hazırda bütün dünyanı narahat edən dini zəmində radikal dini cərəyan və hərəkatların inkişafının qarşısının alınması sahəsində əməkdaşlıq perspektivləri, ortaq tarixi və mənəvi-mədəni irsin yaşadılması və birgə öyrənilməsi, İranda dini təhsil alan azərbaycanlı tələbələrin mövcud problemlərinin həlli və bu prosesinin şəffaf və qanunauyğun şəkildə aparılması olub.

Komitə sədri, həmçinin işğal olunmuş Azərbaycan ərazilərində Ermənistan tərəfindən müştərək dini dəyərlərimiz, o cümlədən İslamın dini və mədəni abidələrinə qarşı vandalizm faktlarını həmsöhbətlərinin diqqətinə çatdıraraq, İranın nüfuzlu dini xadimlərinin bu məsələyə İslam həmrəyliyi prinsipləri çərçivəsində münasibət bildirilməsinin vacibliyini xüsusi qeyd edib. Görüşlər zamanı iki ölkə arasında münasibətlərə mənfi təsir göstərən, dini sahəyə aid və bir çox hallarda əsassız məlumatların yayılmasının qarşısının alınması sahəsində əməkdaşlıq məsələsi müzakirə olunaraq hər iki tərəfdən bu sahədə birgə addımların atılmasının vacibliyi qeyd edilib.

Bununla yanaşı, İslam Mədəniyyəti və Beynəlxalq Əlaqələr Təşkilatının sədri M.Xürrəmşadla görüş zamanı İslam mənəvi irsinin dünyaya tanıtdırılması istiqamətində son ildə DQİDK tərəfindən başlanmış layihələr haqqında məlumat verilib, bu sahədə iki qurum arasında Şəms Təbrizi, Seyid Yəhya Şirvani Bakuvi kimi mütəfəkkirlərin irsinin dünyada tanıdılması, Azərbaycan tədqiqatçılarının əsərlərindən ibarət məcmuənin İranda nəşr edilməsi haqqında konkret razılıqlar əldə edilib.

Dövlət Komitəsinin rəsmi heyətinin səfər proqramı çərçivəsində bu gün Qumda nüfuzlu din xadimləri, Qum dini elmlər hövzəsinin rəhbərliyi və burada təhsil alan azərbaycanlı tələbələrlə görüşlərin keçirilməsi nəzərdə tutulub.

Dövlət Komitəsi sədrinin rəsmi görüşlərində nümayəndə heyətinin üzvləri - İslam Konfransı Gənclər Forumu Avrasiya Regional Mərkəzinin rəhbəri Elçin Əsgərov, DQİDK Beynəlxalq əlaqələr şöbəsinin müdiri Nicat Məmmədli və Azərbaycanın İrandakı səfiri Cavanşir Axundov iştirak ediblər.

Xəbər lenti

Xəbər lenti