"Milli müstəqilliyimiz – mənəvi gücümüz" adlı tədbir keçirilib (FOTO)

Bakı. Elçin Mehdiyev - Trend:

Bu gün Mənəvi Dəyərlərin Təbliği Fondunun təşkilatçılığı ilə “Milli müstəqilliyimiz – mənəvi gücümüz” adlı tədbir keçirilib.

Trend-in məlumatına görə, tədbirdə millət vəkilləri, şəhid ailələri və digər qonaqlar iştirak ediblər.

Tədbiri giriş sözü ilə açan Mənəvi Dəyərlərin Təbliği Fondunun icraçı direktoru Mehman İsmayılov bildirib ki, hər bir insanın həyatında müəyyən dəyərlər var və bu dəyərlər mühüm əhəmiyyət kəsb edir: “Tarixən Azərbaycan ərazilərində bir çox dövlətlər qurulub, müxtəlif işğalçılar torpaqlarımızı zəbt edib, lakin xalqımızın dəfələrlə müstəqilliyini qazanması Azərbaycan xalqının istiqlal əzmini göstərir. 1991-ci ildə xalqımızın iradəsi, əzmi nəticəsində müstəqilliyimiz yenidən əldə edildi. Lakin həmin dövrdə müstəqilliyimiz üzərində qara buludlar əsirdi, müstəqilliyimiz üçün ciddi təhdidlər yaranmşdı. Ulu öndər Heydər Əliyevin yenidən hakimiyyətə qayıtması müstəqilliyimizi bu bəlalardan xilas etdi və müstəqilliyimiz möhkəmləndi. Bu gün beynəlxalq aləmdə mürəkkəb bir vəziyyət var, lakin cənab Prezident İlham Əliyev tərəfindən aparılan düşünülmüş və qətiyyətli siyasət nəticəsində Azərbaycanın müstəqilliyi qorunur və daha da inkişaf etdirilir. Müstəqilliyimiz elə bir dəyərdir ki, bir çox dəyərləri birləşdirir və möhkəmləndirir”.

Daha sonra SƏS TV tərəfindən çəkilmiş Azərbaycanın müstəqilliyi və inkişafı haqqında film nümayiş olunub.

Tədbirdə çıxış edən millət vəkili Elman Nəsirov bildirib: "Azərbaycan müstəqilliyinin 27-ci ildönümünü qeyd edir. 1991-ci il çox gərgin il idi, torpaqlarımız işğal edilirdi, itkilər verirdik. Bir yandan da hakimiyyət uğrunda mübarizə baş qaldırmışdı, ölkə parçalanma ərəfəsində idi, hakimiyyətsizlik, özbaşınalıq hökm sürürdü. Belə bir vəziyyətdə Azərbaycanın müstəqilliyi məsələsi təhlükə altında idi. O zamankı hakimiyyət Azərbaycanın müstəqilliyinin elan olunmasını ləngidirdi, başqa sovet ölkələri müstəqilliklərini elan etsə də, Azərbaycanın müstəqilliyinin elan edilməsi ləngiyirdi. Nəhayət, uzun prosesdən sonra müstəqillik elan edildi".

E.Nəsirov vurğulayıb ki, ümummilli lider Heydər Əliyevin addımları müstəqilliyimizi şərtləndirdi: "Heydər Əliyev ilk dəfə Azərbaycanın üçrəngli bayrağını Naxçıvan Muxtar Respublikasının Ali Sovetinə gətirdi, Naxçıvanın adından "Sovet Sosialist Respublikası" sözlərini götürdü. Azərbaycan qarşısında məsələ qaldırdı ki, rəsmi Bakı da bu addımı atsın. Azərbaycanın həqiqi müstəqilliyi Heydər Əliyevin hakimiyyətə gəlməsi ilə başladı və Azərbaycan sabitlik və inkişaf yoluna qədəm qoydu. Artıq 1996-cı ildə Azərbaycanın iqtisadiyyatı tam bərpa olunmuşdu və inkişaf edirdi. Bu gün cənab Prezident İlham Əliyev həmin siyasəti çox uğurla davam etdirir, Azərbaycan dünyada böyük nüfuza malik bir ölkəyə çevrilib. Bu gün Azərbaycanın valyuta ehtiyatları 45 milyard dollardır, bütün parametrlər üzrə Azərbaycan çox güclənib, böyük nailiyyətlər əldə olunub və bütün bunlar Prezident İlham Əliyev tərəfindən həyata keçirilən uğurlu siyasətin nəticəsidir”.

Daha sonra çıxış edən millət vəkili Aydın Mirzəzadə bildirib ki, müstəqillik Azərbaycan xalqının genindədir: "Azərbaycan xalqı mənəvi gücü sayəsində müstəqilliyə nail oldu. Ulu öndər Heydər Əliyevin Azərbaycan tarixində xidmətləri əvəzsizdir. Heydər Əliyevin Azərbaycanda hakimiyyətə qayıtması ölkəmizi müstəqilliyimizin ilk illərində yaranmış bütün bəlalardan xilas etdi. Bu gün ümummilli lider Heydər Əliyevin siyasəti Prezident İlham Əliyev tərəfindən uğurla davam etdirilir və ölkəmiz bütün sahələrdə mühüm inkişafa nail olub, beynəlxalq aləmdə böyük nüfuz qazanıb".

Tədbirdə çıxış edən Mənəvi Dəyərlərin Təbliği Fondunun Himayəçilər Şurasının üzvü, “Səs” Media Qrupunun rəhbəri Bəhruz Quliyev deyib ki, müstəqilliyimizin ilk illərində Azərbaycanda vəziyyət olduqca acınacaqlı idi, müstəqilliyimiz böyük təhlükə altında idi: "Azərbaycan parçalanmaq təhlükəsi ilə qarşılaşmışdı, ölkədə özbaşınalıq hökm sürürdü, Bakıda küçəyə çıxmaq mümkün deyildi".

B.Quliyev qeyd edib ki, o zaman Azərbaycan xalqına bir lider lazım idi: “Bu səbəbdən 1992-ci il 16 oktyabrda 91 Azərbaycan ziyalısı “SƏS” qəzeti vasitəsilə müstəqilliyi qorumaq üçün ulu öndər Heydər Əliyevə müraciət etdi. Xalq özünə bir lider istəyirdi. Heydər Əliyev hələ hakimiyyətə qayıtmamış xalqın qəlbində idi. Hamı bilirdi ki, Azərbaycanı Heydər Əliyevdən başqa heç kim xilas edə bilməyəcək. Ümummilli lider Heydər Əliyev “SƏS” qəzeti vasitəsilə Azəbaycanın xilas olması konsepsiyasını təqdim etdi və orada hökumətin atmalı olduğu addımları, çıxış yollarını göstərdi. Mən bunu Azərbaycanın "xilas konsepsiyası" adlandırıram. O zaman xalq təkidlə Heydər Əliyevin hakimiyyətə qayıtmasını istədi. Məhz ulu öndərin qayıdışı Azərbaycan tarixinə qızıl hərflərlə yazıldı, ölkəmizi bütün bəlalardan xilas etdi. Lider-xalq sevgisi o zaman Azərbaycanı xilas etdi, bu gün də ölkəmizin möhkəmlənməsinə, inkişafına xidmət edir”.

O vurğulayıb ki, Prezident İlham Əliyev ümummilli lider tərəfindən qoyulan yolu uğurla davam etdirir: “Cənab Prezidentin 15 illik fəaliyyəti göstərdi ki, o, ulu öndərin ən layiqli davamçısıdır. Bu gün cənab Prezidenti xalq sevir və bütün seçkilərdə də xalq sübut etdi ki, İlham Əliyevə etimad göstərir, onun siyasətini dəstəkləyir. Cənab Prezidentin bütün siyasətinin mərkəzində insan amili, vətəndaş amili dayanır, xarici siyasətdə isə dövlət marağı, xalq marağı dayanır. Müstəqilliyimiz bizim milli sərvətimizdir, onu göz bəbəyimiz kimi qorumalıyıq”.