Bakı. Trend:
ABŞ-ın Azərbaycanda dini etiqad azadlığı ilə bağlı bəyanatının heç bir əsası yoxdur.
Bu barədə Trend-ə “Azİz” İsrail-Azərbaycan Beynəlxalq Assosiasiyasının sabiq prezidenti Lev Spivak ABŞ dövlət katibi Antoni Blinkenin bir sıra ölkələrin, o cümlədən Azərbaycanın dini etiqad azadlığı ilə bağlı “xüsusi izləmə siyahısı”na salınması ilə bağlı bəyanatını şərh edərkən bildirib.
"Bu siyasi demarşlar sadəcə olaraq kiminsə qarşısında özünü sübut etmək, kiminsə qarşısında özünü göstərmək üçün bəhanədir. Bunun heç bir real mənası olduğunu düşünmürəm, heç bir əsası yoxdur", - deyə o bildirib.
L.Spivak qeyd edib ki, fəaliyyət növünə görə Azərbaycanın müxtəlif şəhərlərində yaşayan yəhudi icmaları ilə daim əlaqə saxlayır:
"Mən dağ yəhudiləri, gürcü yəhudiləri və Bakının Aşkenazi icmalarının rəhbərləri ilə, Azərbaycanda Xabadı təmsil edən ravvin, Azərbaycanda baş ravvinlə yaxından tanışam. Sumqayıtın və Krasnaya Slobodanın yəhudi icmasını tanıyıram. Yəhudilərlə İsmayıllıda görüşdüm, orada camaat yoxdur, amma bu heç nəyi dəyişmir, sadəcə olaraq buna ehtiyac hiss etmirlər. Onlar da ətrafdakı bütün azərbaycanlılar, müsəlmanlar, ateistlər, hər cür insan kimi adi həyat sürürlər. Gəncədə yəhudi icması ilə görüşmüşəm, icma sədrini tanıyıram. Gəncədə yəhudi icması ilə görüşmüşəm, icma sədrini tanıyıram. İsraillə Azərbaycan arasındakı münasibətlərlə, eləcə də Azərbaycandan olan mühacirlərlə bağlı məsələlərlə məşğul olduğum bu illər ərzində mən həyatımda heç vaxt nədənsə şikayət eşitməmişəm".
L.Spivak İsraildə baş verən bu mövzu ilə bağlı bir hekayə haqqında da danışdı:
"2007 və ya 2008-ci ildə Knesset İnsan Haqları Komitəsinin illik iclası keçirildi. Müxtəlif icmaların nümayəndələri, Mərakeşdən, Fransadan, Rusiyadan gələn mühacirlər toplaşmışdılar. Azərbaycan Mədəniyyət Mərkəzinin direktoru Yeganə Salman və mən Azərbaycandan olan insanları təmsil edirdik. Hər kəs öz ölkələrində yəhudilərin bəzi problemlərindən şikayətlənirdi. Növbə bizə çatanda dedim ki, Azərbaycandakı yəhudilərin problemləri azərbaycanlıların problemlərindən qətiyyən fərqlənmir və heç bir şəkildə seçilmir. Biz həmişə Azərbaycanda yaşamışıq, qonşularımızın milliyyətcə kim olduğunu bilməmişik və müxtəlif dinlərin bayramlarını həmişə sevinclə qeyd etmişik. Azərbaycanda çoxlu sayda yəhudi dostlarım var, onlar heç yerə getməyə hazırlaşmırlar, çünki bu ölkədə özlərini yaxşı hiss edirlər. Onlar heç bir ayrı-seçkilik və təzyiq hiss etmirlər. Hər kəs öz həyatından çox razıdır".