Sentyabrın 6-da Ağır Cinayətlərə Dair İşlər Üzrə Məhkəmədə hakim Rasim Sadıqovun sədrliyi ilə dahi bəstəkar Üzeyir Hacıbəyovun əsərlərini oğurlamaqda və bərbad vəziyyətə salmaqda təqsirləndirilən Rüfət Xəlilovun məhkəməsi başlanacaq.
Trend in məlumatına görə, Rüfət Xəlilov dahi bəstəkarın Bakı şəhərindəki Xatirə Ev Muzeyinin direktoru olmaqla yanaşı, həm də mərhumun yaxın qohumu imiş.
Bu cinayət işinin ibtidai istintaqını Azərbaycan Respublikası Milli Təhlükəsizlik Nazirliyinin (MTN) İstintaq İdarəsi aparıb. İbtidai istintaq zamanı müəyyən edilib ki, Rüfət Xəlilov 1999-cu ildən başlayaraq Ü.Hacıbəyova məxsus xüsusi tarixi, elmi, ədəbi və mədəni dəyəri olan bir sıra əsərlərinin, yarımçıq qalmış əlyazmalarının ilk partituralarını, müxtəlif xadimlərlə məktublarını gizli yolla muzeydən çıxarıb.
Satış məqsədilə öz evində saxlasa da, MTN əməkdaşları bundan xəbər tutub və qarşısını alıb. Bundan əlavə, Rüfəx Xəlilov narkotik maddələr və odlu silah saxlamaqda təqsirləndirilir.
Muzey direktoru narkotik maddə və odlu silahla bağlı ittihamları qəbul etsə də, oğurluqla bağlı ittihamlarla tam razılaşmayıb. İfadəsində bildirib ki, atası Ramazan Xəlilov dahi bəstəkarın həm yaxın qohumu, həm dostu, həm də onun köməkçisi olub. 1975-ci ildə bəstəkarın Ev Xatirə Muzeyi yaradılandan sonra atası həmin muzeyə direktor təyin edilib.
O vəfat edərkən muzeydəki işini davam etdirməyi Rüfət Xəlilova tapşırıb. O da atasından qalan arxivi evinə köçürüb. Ü.Hacıbəyova məxsus olan arxivdə olan əşalardan və sənədlərdən heç kimə satmayıb və bağışlamayıb.
