Noyabrın 3-də "Azad və Ədalətli Seçkilər Uğrunda" Əlaqələndirici Məşvərət Şurası məntəqə seçki komissiyalarının protokollarının forma və məzmunundakı uyğunsuzluqlar barədə hazırladığı yeni sənədi Mərkəzi Seçki Komissiyasına göndərib. Bu barədə Trend ə Məşvərət Şurasından məlumat verilib.
Qeyd edək ki, Məşvərət Şurasına üzv olan qeyri-hökumət təşkilatları (QHT) Mərkəzi Seçki Komissiyasına (MSK) "Milli Məclisə seçkilərdə hərbçilərin iştirakına dair" Təlimatın bəzi müddəalarının Seçki Məcəlləsinə zidd olması barədə müraciət göndərmişdi. Həmin məraciətdə QHT-lər MSK-dan bu sənəddə göstərilən qanun pozuntularının aradan qaldırılması üçün müvafiq tədbirlərin görülməsi xahiş etmişdilər. Lakin müraciəti imzalamış QHT-lərə bu günə qədər də cavab verilmədiyi üçün Seçki Məcəlləsinə uyğun olaraq Apellyasiya Məhkəməsinə MSK-nın qərarından şikayət verilib. Noyabrın 2-də hakim Əhməd Əhmədovun sədrliyi ilə şikayətə baxılıb. Lakin məhkəmə iddianın əsassız olduğunu səbəb göstərərək QHT-lərin şikayətini təmin etməyib. Məhkəmənin qərarı noyabrın 3-də tərəflərə təqdim edilib. "Azad və Ədalətli Seçkilər Uğrunda" Əlaqələndirici Məşvərət Şurasının üzvləri Apellyasiya Məhkəməsinin qərarından Ali Məhkəməsinə şikayət verəcək.