Ağstafanın Saloğlu kəndinin ətrafında patlamamış hərbi sursatların təmizlənməsi üçün ANAMA təşkilatında yeni yaranan 36 nəfərlik operator qrupunun artıq təlimləri başa çatıb. Trend in bölgə müxbiri bildirir ki, bu gün onlara ANAMA təşkilatının Xanlar rayonunda yerləşən bazasında NATO ilə birgə olan layihənin sertifikatları təqdim olunub.
Bu ayın 14-dən artıq Saloğluda təmizləmə işlərinə başlanacaq. Ərazidə operatorlarla birgə 60 nəfər işçi də çalışacaq. ANAMA agentliyinin rəhbəri Nazim İsmayılovun sözlərinə görə, 600 min kvadrat metr ərazidə təmizləmə işləri aparılacaq. Təmizlənmə prosesi iki mərhələdə olacaq. İlk olaraq torpağın 30 santimetr dərinliyində olan partlamamış hərbi sursatlar təmizlənəcək.İkinci mərhələdə isə həmin ərazilərdə daha dərin qatda yerləşən minaların xüsusi robot tipli, kənardan idarə olunan maşınlarla təmizlənmə prosesi həyata keçiriləcək.
Qeyd edək ki, Ağstafada da bu ay yeni bir baza yaradılır. ABŞ səfirliyinin ataşesi Erik Simsonun sözlərinə görə, yaxın vaxtlarda peşəkarlığı artırmaq məqsədilə yeni təlimlərə başlanılacaq.
Onu da qeyd edək ki, tədbirdə həmçinin minaya düşən Xanlar sakininə ANAMA təşkilatı tərəfindən əlil arabası təqdim olunub.