Müasir Müsavat Partiyası (MMP) oktyabrın 31-də saat 15.00-da Fransanın Bakıdakı səfirliyi yaxınlığında keçirdiyi piketdən sonra səfirliyin binası önünə qara əklil qoyub. Trend xəbər verir ki, etiraz piketində 50-yə yaxın müasir müsavatçı iştirak edib.
Polislər piket iştirakçılarına səfirliyin yerləşdiyi binaya yaxınlaşmağa imkan verməyiblər. Qeyd edək ki, piketin keçirilməsinə səbəb Fransa parlamentinin Milli Assambleyasında qondarma erməni soyqırımını tanımayan vətəndaşlarına cəzanın tətbiqi ilə bağlı qəbul edilən qanun layihəsinə etiraz olub. Piketin qətnaməsi səfirliyə təqdim edilib. Qarar əklil isə səfirliyin binası önünə qoyulub.
Müxalifət yönümlü MMP 2002-ci ildə Hafiz Hacıyevin təşəbbüsü və sədrliyi ilə yaradılıb. Piket insidentsiz ötüşüb.
